കൊച്ചി: കൊച്ചി മെട്രോയുടെ കോച്ചുകള്‍ക്ക് റെയില്‍വേയുടെ റിസര്‍ച്ച് ഡിസൈന്‍സ് ആന്‍ഡ് സ്റ്റാന്‍ഡേര്‍ഡ്‌സ് ഓര്‍ഗനൈസേഷന്റെ (ആര്‍.ഡി.എസ്.ഒ) സ്പീഡ് സര്‍ട്ടിഫിക്കറ്റ് ലഭിച്ചു. കമീഷനിങ്ങിന്റെ ഭാഗമായി നിയമപ്രകാരമുള്ള ആദ്യ സര്‍ട്ടിഫിക്കറ്റാണ് ഇത്. അടുത്ത ഘട്ടമായ കമ്മിഷണര്‍ ഓഫ് മെട്രോ റെയില്‍ സേഫ്റ്റിയുടെ (സി.എം.ആര്‍.എസ്) അനുമതിക്കായി ഉടന്‍ അപേക്ഷ നല്‍കുമെന്ന് കെ.എം.ആര്‍.എല്‍ അധികൃതര്‍ വാര്‍ത്താക്കുറിപ്പില്‍ അറിയിച്ചു.
കൊച്ചി മെട്രോയുടെ പരീക്ഷണ ഓട്ടം പരിശോധിച്ചാണ് ആര്‍.ഡി.എസ്.ഒ സര്‍ട്ടിഫിക്കറ്റ് നല്‍കിയത്. അല്‍സ്‌റ്റോമാണ് കൊച്ചി മെട്രോയ്ക്കു വേണ്ടി കോച്ചുകള്‍ തയ്യാറാക്കിയത്. ആര്‍.ഡി.എസ്.ഒയുടെ അനുമതി തടസമില്ലാതെ ലഭിച്ചത് കൊച്ചി മെട്രോയ്ക്ക് അഭിമാന മുഹൂര്‍ത്തമാണെന്ന് കെ.എം.ആര്‍.എല്‍ എം.ഡി ഏലിയാസ് ജോര്‍ജ് പറഞ്ഞു.
ഡി.എം.ആര്‍.സി.യുടെയും കെ.എം.ആര്‍.എല്ലിന്റെയും എന്‍ജിനീയര്‍മാര്‍ ഒത്തൊരുമിച്ച് കഠിനാധ്വാനം ചെയ്താണ് ഇത് സാധ്യമാക്കിയതെന്ന് അദ്ദേഹം വിശദമാക്കി. മെട്രോ വാണിജ്യ അടിസ്ഥാനത്തില്‍ സര്‍വീസ് ആരംഭിക്കുന്നതിനു മുന്‍പായി എല്ലാ സംവിധാനങ്ങളും പരിശോധനയ്ക്ക് വിധേയമാക്കും.