മൂവാറ്റുപുഴ: ബൈക്കില്‍ കറങ്ങി നടന്ന് മാലപൊട്ടിക്കുന്ന യുവാവിനെ പൊലിസ് അറസ്റ്റ് ചെയ്തു. കോതമംഗലം കോഴിപ്പിള്ളി പ്രിന്‍സ്(24)നെയാണ് കല്ലൂര്‍ക്കാട് എസ്.ഐ.എബി എം.പിയുടെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്.
കഴിഞ്ഞ ദിവസം ആയവന എസ്.എന്‍.ഡി.പി ജങ്ഷനില്‍ പലചരക്ക് കട നടത്തുന്ന വാഴാട്ടില്‍ സന്തോഷിന്റെ ഭാര്യ മീര സന്തോഷിന്റെ 1.25 പവന്‍ വരുന്ന സ്വര്‍ണ്ണ മാല പൊട്ടിച്ച് കടന്നുകളയാന്‍ ശ്രമിച്ച കേസിലാണ് ഇയാള്‍ പിടിയിലായത്.
കടയിലെത്തിയ പ്രിന്‍സ് സോഡ ആവശ്യപ്പെടുകയായിരുന്നു. ഈസമയം കടയിലുണ്ടായിരുന്ന മീര സന്തോഷ് സോഡ ഗ്ലാസിലേക്ക് ഒഴിച്ച് കൊണ്ടിരുന്നപ്പോള്‍ കഴുത്തില്‍ കിടന്ന സ്വര്‍ണ്ണമാല പൊട്ടിച്ച് ബൈക്കില്‍ രക്ഷപ്പെടുകയായിരുന്നു. വിവരമറിച്ച് സ്ഥലത്തെത്തിയ കല്ലൂര്‍ക്കാട് പൊലിസ് നടത്തിയ പരിശോധനയിലാണ് ഇയാള്‍ പിടിയിലായത്.
അന്വേഷണ സംഘത്തില്‍ എ.എസ്.ഐ ബഷീര്‍, സ്‌പെഷ്യല്‍ പൊലിസ് ഓഫിസര്‍മാരായ ബൈജു, അനസ്, ജോസഫ് എന്നിവരുനേതൃത്വത്തിലാണ് പ്രതിയെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.