കഴിഞ്ഞതവണ കൈവിട്ടുപോയ ഹയര്‍ സെക്കന്‍ഡറി വിഭാഗം പരിചമുട്ടുകളിയിലെ വിജയം ഇത്തവണ എന്‍.എ.എം.എച്ച്.എസ്.എസ് പെരിങ്ങത്തൂര്‍ പിടിച്ചെടുത്തു. ജില്ലാ സ്‌കൂള്‍ കലോത്സവത്തില്‍ തുടര്‍ച്ചയായ അഞ്ചാം വിജയം നേടാന്‍ കഴിഞ്ഞ തവണ മത്സരത്തിനിറങ്ങിയ പെരിങ്ങത്തൂരിനായില്ല. ഇത്തവണ സ്‌കൂളിലെ ഹിന്ദി, സ്‌കൗട്ട് അധ്യാപകനായ കെ.പി ശ്രീധരന്റെ ശിക്ഷണത്തിലിറങ്ങിയ കുട്ടികള്‍ക്ക് പെരുമ നിലനിര്‍ത്താന്‍ വിജയം അനിവാര്യമായിരുന്നു. ആറു ടീമുകള്‍ അണിനിരന്ന മത്സരത്തില്‍ കടുത്ത പോരാട്ടത്തിലാണ് പെരിങ്ങത്തൂര്‍ വിജയിച്ചത്. സി.എച്ച് സനൂപ്, അജിനാസ്, സിനാന്‍, സഹദ്, അനസ്, നിയാസ്, അറാഫത്ത്, ബാസില്‍ എന്നിവരാണ് പെരിങ്ങത്തൂരിനുവേണ്ടി വേദിയിലെത്തിയത്.