തിരുവനന്തപുരം: ഭോപ്പാലില്‍ മലയാളി സംഘടനകളുടെ സ്വീകരണസമ്മേളനത്തില്‍ പങ്കെടുക്കാനെത്തിയ തന്നെ പൊലിസ് തടഞ്ഞ സംഭവം ആര്‍.എസ്.എസ് സംസ്‌കാരത്തിന്റെ പ്രതിഫലനമെന്ന് മുഖ്യമന്ത്രി പിണറായി വിജയന്‍. കേരളത്തിലായിരുന്നുവെങ്കില്‍ ഇത്തരമൊരു സംഭവം നടക്കില്ലായിരുന്നു.

ഇതിലൂടെ സംസ്‌കാരങ്ങളുടെ അന്തരമാണ് വ്യക്തമാകുന്നെതന്നും മുഖ്യമന്ത്രി അഭിപ്രായപ്പെട്ടു. ആര്‍.എസ്.എസ് പ്രതിഷേധക്കാരെ തടയുന്നതിനു പകരം പ്രതിഷേധത്തിന്റെ പേര് പറഞ്ഞു തന്നെ മടക്കി അയച്ചത് ശരിയായ നടപടിയല്ലെന്നും പിണറായി പറഞ്ഞു. അവിടെ പ്രതിഷേധം സംഘടിപ്പിക്കാന്‍ തക്ക കാരണങ്ങളൊന്നും ഉണ്ടായിരുന്നില്ലെന്നും പ്രതിഷേധം സംഘടിപ്പിച്ചത് ആര്‍.എസ്.എസുകാരായതിനാലാണ് മധ്യപ്രദേശ് പൊലിസ് നടപടി സ്വീകരിക്കാതിരുന്നതെന്നും പിണറായി ആരോപിച്ചു.

സംഭവത്തില്‍ മധ്യപ്രദേശ് ഡി.ജി.പി നേരിട്ടെത്തി മുഖ്യമന്ത്രിയോട് ക്ഷമ ചോദിച്ചിരുന്നു. മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാന്‍ ഫോണില്‍ വിളിച്ചും ഖേദമറിയിച്ചിരുന്നു.