പാലക്കാട്: സെയില്‍സ് ടാക്‌സിനെ വെട്ടിച്ച് കടത്തിയ വെണ്ണ എക്‌സൈസ് ഇന്റലിജന്‍സ് സംഘം പിടികൂടി. പൊള്ളാച്ചിയില്‍നിന്ന് തൃശൂര്‍ ജില്ലയിലെ കൊരട്ടിയിലേക്ക് കൊണ്ടു പോയ വെണ്ണയാണ് പിടികൂടിയത്.
ഇന്നലെ രാവിലെ 11 മണിയോടെ വാളയാര്‍ ടോള്‍ പ്ലാസയ്ക്ക് സമീപം എക്‌സൈസ് ഇന്റലിജന്‍സ് സംഘം നടത്തിയ വാഹന പരിശോധനയിലാണ് മാരുതി 800 കാറില്‍ 10 ടിന്നുകളിലായി കടത്തിയ 150 ലിറ്റര്‍ വെണ്ണ കണ്ടെത്തിയത്.
കേക്ക് നിര്‍മാണത്തിന് ഉപയോഗിക്കുന്ന വെണ്ണ കടത്തിയ കോയമ്പത്തൂര്‍ ധനപുരം സ്വദേശി രാംജിനെ എക്‌സൈസ് സംഘം വാണിജ്യ നികുതി ഉദ്യോഗസ്ഥര്‍ക്ക് കൈമാറി. ഇയാളില്‍നിന്ന് 38000 രൂപ പിഴ ഈടാക്കി.
എക്‌സൈസ് ഇന്റലിജന്‍സ് ഇന്‍സ്‌പെക്ടര്‍ പി. ഉമ്മറിന്റെ നേതൃത്വത്തില്‍ പ്രവന്റീവ് ഓഫിസര്‍മാരായ എ. ഷൗക്കത്തലി, ടി. സുരേഷ്, എ. ബിപന്‍ദാസ്, സി. സെന്തില്‍കുമാര്‍, ആര്‍. റിനോഷ് എന്നിവരാണ് അന്വേഷണ സംഘത്തിലുണ്ടായിരുന്നത്.