കൊപ്പം: അനവസരത്തില്‍ അശാസ്ത്രീയമായി നിര്‍മ്മിച്ച ഹമ്പുകള്‍ മരണക്കെണികളാവുന്നു. പല സ്ഥലങ്ങളിലും മാനദണ്ഢങ്ങള്‍ പാലിക്കാതെയാണ് ഹമ്പുകള്‍ നിര്‍മിച്ചിരിക്കുന്നത്. കുലുക്കല്ലൂര്‍ എ.യു.പി.സ്‌കൂളിന് മുന്നിലുള്ള ഹമ്പ് ഇത്തരത്തിലുള്ളതാണ്.
കുലുക്കല്ലൂര്‍ റെയില്‍വേ ഗെയ്റ്റിന് അടുത്താണ് ഈ സ്‌കൂള്‍ സ്ഥിതി ചെയ്യുന്നത്. ഗൈറ്റിനിരുവശവും രണ്ടു ഹമ്പുകളുണ്ട്. റെയില്‍വെ മുതല്‍ വാഹനങ്ങളുടെ വേഗത കുറച്ചേ ഓടിക്കാന്‍ സാധിക്കുകയുള്ളൂ. ഈ ഹമ്പും സ്‌കൂളിന് മുന്‍പിലുള്ള ഹമ്പും തമ്മിലുള്ള ദൂരം നൂറ് മീറ്ററില്‍ താഴെയാണ്. അതുകൊണ്ടുതന്നെ കൊപ്പം ഭാഗത്തുനിന്ന് വരുന്ന വാഹനങ്ങളുടെ വേഗത കുറയ്ക്കാന്‍ വീണ്ടുമൊരു ഹമ്പ് സ്‌കൂളിന് മുന്നില്‍ ആവശ്യവുമില്ല. ചെര്‍പ്പുളശ്ശേരി ഭാഗത്ത്‌നിന്നുള്ള വാഹനങ്ങളുടെ വേഗത കുറക്കാന്‍ സ്‌കൂളിന് മുന്നില്‍ വേണമെങ്കില്‍ മാനദണ്ഡങ്ങള്‍ പാലിച്ച് ഹമ്പ് നിര്‍മിക്കാം. നിലവില്‍ സ്‌കൂളിന് മുന്നില്‍ വരിയ രണ്ട് ഹമ്പുകളുണ്ട്. അനാവശ്യമായ രണ്ട് ഹമ്പുകളില്‍ ഒന്ന് പൊളിച്ചു നീക്കണമെന്നും ആവശ്യമാണെങ്കില്‍ സുരക്ഷാ മാനദ്ണ്ഡങ്ങള്‍ പാലിച്ച് ഒരു ഹമ്പ് നിലനിര്‍ത്തുകയുമാണ് വേണ്ടത്.
അതെല്ലൊതെ ഈ വിഷയവുമായി വേണ്ടത്ര അറിവില്ലാത്തവരുടെ വാക്കുകള്‍ കേട്ടും കരാറുകാരെയും ഉദ്യോഗസ്ഥരെയും ഭീഷണിപ്പെടുത്തിയുമുള്ള ഹമ്പ് നിര്‍മാണങ്ങള്‍ ഒരു നിലക്കും അനുവദിക്കരുതെന്നാണ് യാത്രക്കാരും പൊതുജനങ്ങളും അഭിപ്രായപ്പെടുന്നത്.