പറവൂര്‍: ദേശീയപാത 17ല്‍ കൊച്ചാലില്‍ വാഹനങ്ങള്‍ കൂട്ടിയിടിച്ച് നിരവധി പേര്‍ക്ക് പരുക്ക്. ഇന്നലെ രാവിലെ പത്തുമണിയോടെ വരാപ്പുഴ കൂനമ്മാവ് കൊച്ചാല്‍ കവലയ്ക്കു സമീപം വച്ചാണ് അപകടം ഉണ്ടായത്. കോഴിക്കോട് നിന്നും ആലപ്പുഴയ്ക്കു പോകുകയായിരുന്ന കെ.എസ്.ആര്‍.ടി.സി സൂപ്പര്‍ഫാസ്റ്റും എറണാകുളത്തു നിന്നും തൃശ്ശൂര്‍ ഭാഗത്തേക്ക് വരികയായിരുന്ന കയായിരുന്ന ടാങ്കര്‍ ലോറിയും തമ്മിലാണ് കൂട്ടിയിടിച്ചത്. സംഭവത്തെ തുടര്‍ന്ന് മണിക്കൂറുകളോളം ദേശീയപാതയില്‍ല്‍ ഗതാഗതം തടസപ്പെട്ടു.
പറവൂര്‍ പൊലിസും ഫയര്‍ഫോഴ്‌സും സ്ഥലത്തെത്തി അപകടത്തില്‍പ്പെട്ട വാഹനങ്ങള്‍ മാറ്റി മണിക്കൂറുകള്‍ക്ക് ശേഷമാണ് ഗതാഗതം പുന:സ്ഥാപിക്കാനായത്.കെഎസ്ആര്‍ടിസി മുന്നില്‍ പോകുകയായിരുന്ന കാറിനെ മറികടന്നു വരുമ്പോഴാണ് ടാങ്കറുമായി കൂട്ടിയിടിച്ചത്. മറികടക്കുന്നതിനിടെ കാറിലും ഇടിച്ചിട്ടുണ്ട്.
ഇടിയുടെ ആഘാതത്തില്‍ രണ്ടു വാഹനങ്ങളുടെയും മുന്‍ഭാഗം തകര്‍ന്നു. കൂടാതെ ബസില്‍ ഉണ്ടായിരുന്ന 20 ഓളം യാത്രക്കാര്‍ക്ക് പരിക്ക് പറ്റിയിട്ടുണ്ട്. ഇവരെ പറവൂര്‍ താലൂക്ക് ആശുപത്രിയിലും കളമശ്ശേരി മെഡിക്കല്‍ കോളജ്, പറവൂരിലെ സ്വകാര്യആശുപത്രി എന്നിവിടങ്ങളില്‍ പ്രവേശിപ്പിച്ചു. സംഭവത്തില്‍ പറവൂര്‍ പൊലിസ് കേസെടുത്തു.