കൊച്ചി: ഓണ്‍ലൈന്‍ ടാക്‌സി സര്‍വിസ് ആയ യൂബര്‍ ടാക്‌സിക്കെതിരേ എറണാകുളം നോര്‍ത്ത് റയില്‍വേ സ്‌റ്റേഷനില്‍ ഓട്ടോ ഡ്രൈവര്‍മാരുടെ ഭീഷണി.

പിന്നണി ഗായിക സയനോര വിളിച്ച ടാക്‌സിയില്‍ കയറാന്‍ ഗായികയെ ഓട്ടോ ഡ്രൈവര്‍മാര്‍ സമ്മതിച്ചില്ല.

സമൂഹ മാധ്യമമായ ഫേസ്ബുക്കിലൂടെ സയനോര തന്നെയാണ് ഇക്കാര്യങ്ങള്‍ പറഞ്ഞത്.

പുലര്‍ച്ചെ നാലുമണിക്ക് മലബാര്‍ എക്‌സ്പ്രസില്‍ കൊച്ചിയില്‍ എത്തിയപ്പോഴാണ് നേരത്തെ ബുക്കുചെയ്തതുപ്രകാരം ടാക്‌സി എത്തിയത്. എന്നാല്‍ ഒരു സംഘം ഓട്ടോ ഡ്രൈവര്‍മാര്‍ തടയുകയായിരുന്നു എന്ന് സയനോര പറഞ്ഞു.

ടാക്‌സിയില്‍ പോകാന്‍ കഴിയില്ലെന്ന ഓട്ടോ ഡ്രൈവര്‍മാരുടെ നിലപാടിനെ തുടര്‍ന്ന് വാക്കുതര്‍ക്കവും ഉണ്ടായി.

ഒറ്റയ്ക്ക് യാത്ര ചെയ്യുന്ന സ്ത്രീ എന്ന പരിഗണന പോലും ഓട്ടോക്കാര്‍ തനിക്കു നല്‍കിയില്ലെന്ന് സായനോര പറഞ്ഞു. താന്‍ ബഹളം  വച്ചതുമൂലമാണ് യൂബര്‍ ഡ്രൈവര്‍ പരുക്കേല്‍ക്കാതെ രക്ഷപ്പെട്ടതെന്നും സയനോര പറഞ്ഞു.