കരീറ്റിപ്പറമ്പ്: വിദ്യാര്‍ഥികള്‍ക്കിടയില്‍ കഞ്ചാവ് വില്‍പ്പന നടത്തുന്ന യുവാവ് കഞ്ചാവ് പൊതിയുമായി പിടിയില്‍. കരീറ്റിപ്പറമ്പ് ചോയംകുന്നുമ്മലില്‍ ജാബിര്‍ എന്ന മുഹമ്മദാണ് (34) നാട്ടുകാരുടെ പിടിയിലായത്. ഇതരസംസ്ഥാന തൊഴിലാളികള്‍ക്ക് കഞ്ചാവ് വിതരണം ചെയ്യുന്നതിനിടെയാണ് പിടികൂടിയത്. എന്നാല്‍ പ്രതിയെ അറസ്റ്റ് ചെയ്യാന്‍ പൊലിസ് ആദ്യം തയാറായില്ല. വേണ്ട അളവില്‍ കഞ്ചാവ് കൈയില്‍ സൂക്ഷിച്ചില്ലെന്നു പറഞ്ഞായിരുന്നു പൊലിസ് നടപടി. തുടര്‍ന്ന് പൊലിസിനെതിരേ ജനരോഷമുയര്‍ന്നു.
ഇതിനിടയില്‍ ഭരണപക്ഷത്തുള്ള ചിലര്‍ ഇടപെട്ട് പ്രതിയെ രക്ഷിക്കാന്‍ ശ്രമിച്ചത് നേരിയ സംഘര്‍ഷത്തിനിടയാക്കി. പ്രദേശത്തെ വിഘടിത സുന്നി വിഭാഗവും അവരുടെ കേന്ദ്രത്തില്‍ പ്രതിയെ സംരക്ഷിക്കാന്‍ ശ്രമിച്ചെന്നാരോപിച്ചും നാട്ടുകാര്‍ പ്രതിഷേധിച്ചു. ഇതേതുടര്‍ന്ന് ഒടുവില്‍ പ്രതിയെ പൊലിസ് കസ്റ്റഡിയിലെടുക്കുകയായിരുന്നു. എം.എല്‍.എയുടെ ഡ്രൈവറുടെ മകന്‍ കഞ്ചാവുമായി പിടിയിലായപ്പോള്‍ കേസെടുക്കാന്‍ മടിച്ചെന്നും കൊടുവള്ളി പൊലിസിനെതിരേ നേരത്തേ ആക്ഷേപമുണ്ട്.