വാടാനപ്പള്ളി: തളിക്കുളത്തിനും, വലപ്പാടിനും പിന്നാലെ നാട്ടികയിലും കൂടുതല്‍ സി.പി.എം, ഡി.വൈ.എഫ്.ഐ പ്രവര്‍ത്തകര്‍ സി.പി.ഐയിലേക്ക്. മുപ്പതോളം പ്രവര്‍ത്തകരാണ് പാര്‍ട്ടി വിട്ട് സി.പി.ഐയില്‍ ചേരുന്നത്. ഡി.വൈ.എഫ്.ഐ യൂനിറ്റ് സെക്രട്ടറി അവിനാഷ് കാഞ്ഞിരപറമ്പില്‍, മുന്‍ പഞ്ചായത്ത് പ്രസിഡന്റ് ബിജു കുയിലംപറമ്പില്‍, അനിലന്‍ നമ്പട്ടി, രജിത് വെള്ളാനി എന്നിവര്‍ ഉള്‍പ്പടെയുള്ളവരാണ് പാര്‍ട്ടി വിടുന്നത്. ചാത്തന്‍ സ്വാമിക്ക് തുള്ളുന്നവര്‍ക്കും, ക്ഷേത്രങ്ങളില്‍ പോകുന്നവര്‍ക്കും പാര്‍ട്ടിയില്‍ സ്ഥാനമില്ലെന്ന സി.പി.എം നേതാക്കളുടെ നിലപാട് ശരിയല്ലെന്ന് പ്രവര്‍ത്തകര്‍ വാര്‍ത്താസമ്മേളനത്തില്‍ പറഞ്ഞു. സി.പി.എം വിട്ട പ്രവര്‍ത്തകരെ ഉള്‍പ്പെടുത്തി നാളെ വൈകീട്ട് എ.ഐ.വൈ.എഫ് ബ്രാഞ്ച് കമ്മിറ്റി ചേരും.