പയ്യന്നൂര്‍: അഖില കേരള ഖുര്‍ആന്‍ പാരായണ മത്സരം ഇന്ന് സമാപിക്കും. യു.എ.ഇ കവ്വായി മുസ്‌ലിം യൂത്ത് സെന്റര്‍ കവ്വായി മുസ്‌ലിം ലീഗിന്റെ സഹകരണത്തോടെ നടത്തുന്ന മത്സരത്തില്‍ പ്രിലിമിനറി വിഭാഗത്തില്‍ പങ്കെടുത്ത് 200ഓളം മത്സരാര്‍ഥികളില്‍ 40 പേരാണ് സെമിഫൈനല്‍ റൗണ്ടിലേക്ക് തിരഞ്ഞെടുക്കപ്പെട്ടത്. ഇന്നലെ നടന്ന സെമിയില്‍ തിരഞ്ഞെടുക്കപ്പെട്ട 15 പേര്‍ ഇന്നു ഫൈനലില്‍ പങ്കെടുക്കും. ആദ്യത്തെ മൂന്ന് സ്ഥാനക്കാരെ കണ്ടെത്തുന്നതിനുള്ള ഗ്രാന്‍ഡ് ഫിനാലെ വൈകിട്ട് ആറിന് ആരംഭിക്കും. ഒന്നാം സ്ഥാനം നേടുന്നവര്‍ക്ക് ഒരുലക്ഷം രൂപയാണ് സമ്മാനം. രണ്ടാം സമ്മാനമായി 50000 രൂപയും മൂന്നാം സമ്മാനം 25000 രൂപയും നല്‍കും. ഇന്നലെ സമ്മേളനം കാസര്‍കോട് ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍ ഉദ്ഘാടനം ചെയ്തു. എ.ടി.മുഹമ്മദ് കുഞ്ഞി അധ്യക്ഷനായി. റഹ്മത്തുല്ല ഖാസിമി മൂത്തേടം മുഖ്യപ്രഭാഷണം നടത്തി. കെ.ടി സഹദുല്ല, എസ്.എ.പി മുഹമ്മദ് കുഞ്ഞി ഹാജി, കെ.വി റാഷിദ്, കെ അസ്ഹറുദ്ദീന്‍ പ്രസംഗിച്ചു. അലി മദനി പ്രാര്‍ഥന നടത്തി. ഹാഫിസ് കെ.പി മുഹമ്മദ് സഖാഫി ഖിറാഅത്ത് നടത്തി. 'ഖുര്‍ആനിലെ അത്ഭുതങ്ങള്‍' എന്ന സിഡി പ്രദര്‍ശിപ്പിച്ചു.
ഇന്നു വൈകിട്ട് ആറിന് സമാപന സമ്മേളനം കേരള വഖഫ് ബോര്‍ഡ് ചെയര്‍മാന്‍ പാണക്കാട് സയ്യിദ് റഷീദലി ശിഹാബ് തങ്ങള്‍ ഉദ്ഘാടനം ചെയ്യും.
കോഴിക്കോട് ഖാസി സയ്യിദ് മുഹമ്മദ് കോയ ജമലുല്ലൈലി തങ്ങള്‍ അധ്യക്ഷനാകും. മാണിയൂര്‍ അഹമ്മദ് മുസ്‌ലിയാര്‍, ഹാഫിസ് കാഞ്ഞാര്‍ അഹമ്മദ് കബീര്‍ ബാവി, മുസ്‌ലിം യൂത്ത് ലീഗ് സംസ്ഥാന സെക്രട്ടറി പി.കെ ഫിറോസ് പ്രസംഗിക്കും.