പേരാമ്പ്ര: ജില്ലാ കേരളോത്സവത്തിലെ അത്‌ലറ്റിക് മത്സരങ്ങള്‍ സമാപിച്ചപ്പോള്‍ 61 പോയന്റ് നേടി കൊയിലാണ്ടി നഗരസഭ കീരീടം നേടി. ചക്കിട്ടപാറയില്‍ നടന്ന കായികോത്സവത്തില്‍ 54 പോയന്റ് നേടി പേരാമ്പ്ര ബ്ലോക്ക് രണ്ടാംസ്ഥാനത്തും, 51 പോയന്റ് നേടി കോഴിക്കോട് കോര്‍പ്പറേഷന്‍ മൂന്നാം സ്ഥാനത്തിനും അര്‍ഹരായി.
വോളിബോളില്‍ തൂണേരി ബ്ലോക്കാണ് വിജയികള്‍. കുന്നുമ്മല്‍ ബ്ലോക്കിനെയാണ് ഇവര്‍ പരാജയപ്പെടുത്തിയത്. കബഡി മത്സരത്തില്‍ മുക്കം മുന്‍സിപ്പാലിറ്റിയെ പിന്തള്ളി കൊടുവള്ളി ബ്ലോക്ക് ഒന്നാമതെത്തി. വടംവലി മത്സരത്തില്‍ ബാലുശേരി ബ്ലോക്ക് ജേതാക്കളായി. രാമനാട്ടുകരയെ പരാജയപ്പെടുത്തിയാണ് വിജയികളായത്. ഇന്നലെ നടന്ന ഫുട്‌ബോള്‍ മത്സരത്തില്‍ കുന്ദമംഗലം ബ്ലോക്ക് വിജയികളായി. പന്തലായിനി ബ്ലോക്കിനെയാണ് പരാജയപ്പെടുത്തിയത്. അമ്പെയ്ത്ത് മത്സരവും കളരിപ്പയറ്റ് മത്സരവും നടക്കാന്‍ ബാക്കിയുണ്ട്.