ന്യൂഡല്‍ഹി: ക്യാഷ്‌ലെസ്റ്റ് ഇക്കോണമിയെ (പണരഹിത സമ്പദ് വ്യവസ്ഥ) ഉണര്‍ത്തണമെങ്കില്‍ ഗ്രാമങ്ങളില്‍ സൗജന്യ നെറ്റ് സൗകര്യമൊരുക്കണമെന്ന് ടെലികോം നിയന്ത്രണ അതോറിറ്റിയുടെ ശുപാര്‍ശ. മാസാടിസ്ഥാനത്തില്‍ നിശ്ചിത ഡാറ്റ സൗജന്യമായി നല്‍കണമെന്നും ഇതിനുള്ള ഫണ്ട് യൂനിവേഴ്‌സല്‍ സെര്‍വീസ് ഒബ്ലിഗേഷന്‍ ഫണ്ടില്‍ നിന്ന് നല്‍കാനാവുമെന്നും ട്രായ് നിര്‍ദേശിക്കുന്നു.

ഗ്രാമങ്ങളിലെ മൊബൈല്‍ ഉപയോക്താക്കള്‍ക്ക് മാസാടിസ്ഥാനത്തില്‍ 100 എം.ബി സൗജന്യമായി ലഭിച്ചേക്കാമെന്ന് ഇതുസംബന്ധിച്ച് ട്രായ് പറഞ്ഞു.

രാജ്യത്തെ ഗ്രാമങ്ങളിലും വിദൂര പ്രദേശങ്ങളിലും ടെലികോം അടിസ്ഥാന സൗകര്യങ്ങള്‍ എത്തിക്കുന്നതിനായി ട്രായിക്കു കീഴില്‍ പ്രവര്‍ത്തിക്കുന്ന സര്‍ക്കാര്‍ സംവിധാനമാണ് യൂനിവേഴ്‌സല്‍ സെര്‍വീസ് ഒബ്ലിഗേഷന്‍ ഫണ്ട് (യു.എസ്.ഒ.എഫ്). വിവിധ ടെലികോം കമ്പനികളില്‍ നിന്ന് യൂനിവേഴ്‌സല്‍ ആക്‌സസ്സ് ലെവി പിടിച്ചാണ് ഇതു പ്രവര്‍ത്തിക്കുന്നത്.

ഇന്റര്‍നെറ്റിന് വ്യത്യസ്ത നിരക്ക് ഏര്‍പ്പെടുത്തുന്നതിന് കഴിഞ്ഞ ഫെബ്രുവരിയില്‍ ട്രായ് വിലക്കേര്‍പ്പെടുത്തിയിരുന്നു. ഇതേത്തുടര്‍ന്ന് ഫെയ്‌സ്ബുക്കിന്റെ ഫ്രീ ബേസിക്‌സും എയര്‍ടെല്‍ സീറോയും അനുവദിക്കാനും ട്രായ് തയ്യാറായില്ല. സൗജന്യ ഡാറ്റ് സേവനവുമായി ബന്ധപ്പെട്ട് മേയില്‍ ഒരു കൂടിയാലോചനാ പത്രം ഇറക്കുകയും ചെയ്തിരുന്നു.