പൂച്ചാക്കല്‍: പാണാവള്ളി ബോട്ട് ജെട്ടിയില്‍ സാമൂഹ്യവിരുദ്ധരുടെ ശല്യം രൂക്ഷം.
ദിവസവും രാത്രിയില്‍ ഇവിടെ യുവാക്കള്‍ അടങ്ങുന്ന ലഹരിമരുന്നു ഉപയോഗ സംഘം തമ്പടിക്കുന്നെന്നും അവര്‍ നാശനഷ്ടങ്ങള്‍ വരുത്തെന്നും ആരോപണമുണ്ട്.കഴിഞ്ഞ ദിവസം ഇവിടുത്തെ ജങ്കാര്‍ സര്‍വീസിന്റെ ടിക്കറ്റ് കൗണ്ടര്‍ സാമൂഹ്യവിരുദ്ധ സംഘം മോഷ്ടിച്ചിരുന്നു.പൈപ്പുകളും ഗ്രില്ലുകളും ഷീറ്റുമൊക്കെയായി നിര്‍മിച്ചിരുന്ന ടിക്കറ്റ് കൗണ്ടര്‍ മൂന്നു പേരെങ്കിലും പിടിച്ചാലെ അനങ്ങുകയുള്ളു.ഇതാണ് മോഷണം പോയത്.
ബോട്ട് ജെട്ടിയില്‍ കെട്ടിയിട്ടിരിക്കുന്ന ബോട്ടുകള്‍ കെട്ടഴിച്ചുവിടുക, മറ്റ് ഉപകരണങ്ങള്‍ നശിപ്പിക്കുക, പരിസരം വൃത്തികേടാക്കുക തുടങ്ങിയ ശല്യങ്ങളുമുണ്ട്.കടകളെല്ലാം അടച്ചുകഴിഞ്ഞാല്‍ ബോട്ട് ജെട്ടിയില്‍ ഇരുട്ടാണ്. ഒരു വൈദ്യുത വിളക്കു മാത്രമാണുള്ളത്. തടിയില്‍ നിര്‍മിച്ച താല്‍കാലിക ബോട്ട് ജെട്ടിയിലേക്കുള്ള വഴിയില്‍ വൈദ്യുത വിളക്കുകള്‍ ഇല്ലാത്തത് യാത്രക്കാരെ വലയ്ക്കുകയാണ്.പൊലീസ് പട്രോളിങ് വേണമെന്ന് നാട്ടുകാര്‍ ആവശ്യപ്പെട്ടു.