അരീക്കോട്: കാറിലിടിച്ചു നിയന്ത്രണംവിട്ട ലോറി ഇലക്ട്രിക് പോസ്റ്റുകളും തകര്‍ത്തു. കാവനൂര്‍ ഇരിവേറ്റി റോഡില്‍ ഇന്നലെ ഉച്ചയോടെയാണ് സംഭവം. കാവനൂര്‍ ഭാഗത്തേക്ക് എംസാന്റുമായി പോകുകയായിരുന്ന നിസാന്‍ ലോറി മുന്നിലുള്ള വാഹനത്തെ മറികടക്കുന്നതിനിടെ കാവനൂരില്‍നിന്ന് ഇരിവേറ്റി ഭാഗത്തേക്കു പോകുകയായിരുന്ന കാറിലിടിക്കുകയായിരുന്നു.
കാറിലിടിച്ച് നിയന്ത്രണംവിട്ട ലോറി തൊട്ടടുത്തുള്ള രണ്ട് ഇലക്ട്രിക് പോസ്റ്റുകളും തകര്‍ത്ത് സമീപത്തുള്ള തെങ്ങില്‍ ഇടിച്ചാണ് നിന്നത്. ഇടിയുടെ ആഘാതത്തില്‍ റോഡിന്റെ മധ്യത്തിലേക്ക് കാര്‍ തെറിച്ചു. സംഭവസമയം വൈദ്യുതി പ്രവാഹം നിലച്ചതിനാല്‍ വന്‍ ദുരന്തമാണ് ഒഴിവായത്. നാട്ടുകാരും മഞ്ചേരി യൂനിറ്റ് ഫയര്‍ഫോഴ്‌സും നടത്തിയ ശ്രമത്തിനൊടുവിലാണ് വാഹനത്തിനകത്തുള്ളവരെ പുറത്തെടുത്തത്.
അപകടത്തില്‍ ലോറി ഡ്രൈവര്‍ കാവനൂര്‍ സ്വദേശി വട്ടപറമ്പില്‍ അസീസിനെ ഗുരുതര പരുക്കുകളോടെ പെരിന്തല്‍മണ്ണയിലെ സ്വകാര്യ ആശുപത്രിയിലും കാറിലുണ്ടായിരുന്ന കാവനൂര്‍ ഇളയൂര്‍ സ്വദേശി ഹരിദാസനെയും ഭാര്യയേയും കോഴിക്കോട് മെഡിക്കല്‍ കോളജിലും പ്രവേശിപ്പിച്ചു.