കൊണ്ടോട്ടി: ഹജ്ജ് 2017 ട്രെയ്‌നര്‍മാരായി പ്രവര്‍ത്തിക്കാന്‍ അപേക്ഷ നല്‍കിയ അഞ്ചുജില്ലകളില്‍ നിന്നുള്ളവരുടെ അഭിമുഖം പൂര്‍ത്തിയായി. കണ്ണൂര്‍, കാസര്‍കോട്, മലപ്പുറം, പാലക്കാട്, തൃശൂര്‍, ജില്ലകളില്‍ നിന്നുള്ളവരുടെ അഭിമുഖമാണ് പൂര്‍ത്തിയായത്.
കണ്ണൂര്‍, കാസര്‍കോട് ജില്ലകളില്‍ നിന്നുളളവരുടെ അഭിമുഖം ചൊവ്വാഴ്ച കണ്ണൂര്‍ ഡി.ഐ.എസ്.ഇംഗ്ലീഷ് സ്‌കൂള്‍ ഓഫിസിലും, മലപ്പുറം,പാലക്കാട്,തൃശൂര്‍, ജില്ലകളില്‍ നിന്നുളളവര്‍ക്ക് ഇന്നലെ കരിപ്പൂര്‍ ഹജ്ജ് ഹൗസിലുമാണ് അഭിമുഖം നടന്നത്.
ഹജ്ജ് അസി.സെക്രട്ടറി ഇ.സി.മുഹമ്മദ്, ഹജ്ജ് കമ്മിറ്റി അംഗങ്ങളായ എ.കെ.അബ്ദുറഹിമാന്‍, ഡോ.ഇ.കെ അഹമ്മദ് കുട്ടി, ഷരീഫ് മണിയാട്ടുകുടി എന്നിവര്‍ നേതൃത്വം നല്‍കി.
ഇന്ന് കോഴിക്കോട് വഖ്ഫ് ബോര്‍ഡ് ഓഫിസില്‍ രാവിലെ 10ന് നടക്കുന്ന അഭിമുഖത്തില്‍ കോഴിക്കോട്,വയനാട് ജില്ലകളില്‍ നിന്നുളളവര്‍ ഹാജരാകണം. 26ന് എറണാകുളം വഖ്ഫ് ബോര്‍ഡ് ഓഫിസില്‍ രാവിലെ 10ന് നടക്കുന്ന അഭിമുഖത്തില്‍ എറണാകുളം, ഇടുക്കി, കോട്ടയം, ആലപ്പുഴ, കൊല്ലം, പത്തനംതിട്ട, തിരുവനന്തപുരം, ജില്ലകളില്‍ നിന്നുള്ളവരും പങ്കെടുക്കണം.
ഈ വര്‍ഷം 557 പേരാണ് വിവിധ ജില്ലകളില്‍ നിന്ന് അപേക്ഷകരായുള്ളത്.