ന്യൂഡല്‍ഹി: ഡല്‍ഹി ലഫ്.ഗവര്‍ണര്‍ നജീബ് ജങ് രാജിവച്ചു. ഇന്നലെ വൈകുന്നേരത്തോടെ അത്യന്തം നാടകീയമായിരുന്നു അദ്ദേഹത്തിന്റെ രാജി.
രാജിക്കത്ത് രാഷ്ട്രപതിക്ക് അയച്ചുകൊടുത്തു. മുന്‍ ഐ.എ.എസ് ഓഫിസര്‍കൂടിയായ ജങ് ഡല്‍ഹി ലഫ്. ഗവര്‍ണറായി അധികാരമേറ്റത് 2013 ജൂലൈ ഒമ്പതിനായിരുന്നു. അധ്യാപനത്തിലേക്ക് മടങ്ങാനാണ് താല്‍പര്യമെന്നറിയിച്ച അദ്ദേഹം രാജിക്കിടയാക്കിയ കാര്യത്തില്‍ വ്യക്തമായ വിശദീകരണം നല്‍കിയിട്ടില്ല.
രാജിക്കുശേഷം പുറത്തിറക്കിയ പത്രക്കുറിപ്പില്‍ തന്റെ ഭരണകാലത്ത് വേണ്ട സഹായങ്ങള്‍ നല്‍കിയ പ്രധാനമന്ത്രി നരേന്ദ്രമോദിക്ക് അദ്ദേഹം നന്ദി അറിയിച്ചിട്ടുണ്ട്. ഒരുവര്‍ഷം പ്രസിഡന്റ് ഭരണം നടപ്പാക്കിയ കാലത്തുള്‍െപ്പടെ തനിക്ക് ജനങ്ങള്‍ നല്‍കിയ പിന്തുണയിലും അദ്ദേഹം നന്ദി അറിയിച്ചു. കഴിഞ്ഞ രണ്ടു വര്‍ഷക്കാലം സഹകരിച്ച ഡല്‍ഹി മുഖ്യമന്ത്രി അരവിന്ദ് കെജ്‌രിവാളിനേയും അദ്ദേഹം തന്റെ നന്ദി അറിയിച്ചു.
അരവിന്ദ് കെജ്‌രിവാളും ജങും തമ്മില്‍ രൂക്ഷമായ അഭിപ്രായ വ്യത്യാസങ്ങളാണ് നടന്നിരുന്നത്. സര്‍ക്കാറില്‍ അനധികൃതമായി ഇടപെടുന്നുവെന്ന ആരോപണം ഗവര്‍ണര്‍ക്കെതിരായി മുഖ്യമന്ത്രി നിരന്തരം ഉന്നയിച്ചിരുന്നു.