മേപ്പയ്യൂര്‍: പൊതുവിദ്യാലയങ്ങള്‍ മികവിന്റെ കേന്ദ്രങ്ങള്‍ പദ്ധതിയിലുള്‍പെടുത്തി മേപ്പയ്യൂര്‍ ഗവ. വൊക്കേഷണല്‍ ഹയര്‍ സെക്കന്‍ഡറി സ്‌കൂളിനെ അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിനുള്ള നടപടികള്‍ ആരംഭിച്ചു. പദ്ധതിയുടെ വിശദാംശങ്ങള്‍ ചര്‍ച്ച ചെയ്യുന്നതിനും വിഭവസമാഹരണത്തെക്കുറിച്ച് ആലോചിക്കുന്നതിനുമായി ജനപ്രതിനിധികളുടെയും പി.ടി.എ ഭാരവാഹികളുടെയും രാഷ്ട്രീയ പാര്‍ട്ടി നേതാക്കളുടെയും യോഗം മേപ്പയ്യൂരില്‍ ചേര്‍ന്നു.
ബ്ലോക്ക് പഞ്ചായത്ത് പ്രസിഡന്റ് കെ. കുഞ്ഞിരാമന്‍ അധ്യക്ഷനായി. പേരാമ്പ്ര മണ്ഡലം വികസന മിഷന്‍ കണ്‍വീനര്‍ എം.കുഞ്ഞമ്മദ് പദ്ധതി വിശദീകരിച്ചു. കെ. രാജീവന്‍ പ്രവര്‍ത്തന രൂപരേഖ അവതരിപ്പിച്ചു. പഞ്ചായത്ത്തല സെമിനാര്‍, വാര്‍ഡ്തല കമ്മിറ്റി രൂപീകരണം, ഗൃഹസന്ദര്‍ശനം എന്നിവ നടത്താനും തീരുമാനിച്ചു.