കണ്ണൂര്‍: യു.ഡി.എഫ് ഭരണകാലത്ത് ജില്ലയെ നടുക്കിയ പ്രധാന അപകടങ്ങളായിരുന്നു ചാലയിലും പൊടിക്കുണ്ടിലും ഉണ്ടായത്. 2012 ഓഗസ്റ്റ് 27നു രാത്രി 11 ഓടെയായിരുന്നു 20 പേരുടെ മരണത്തിനിടയാക്കിയ ചാല ടാങ്കര്‍ ദുരന്തം. അപകടത്തെ തുടര്‍ന്നു റോഡിനു വീതികൂട്ടി ഡിവൈഡറുകള്‍ സ്ഥാപിച്ചതല്ലാതെ മരിച്ചവരുടെ കുടുംബങ്ങളെ സര്‍ക്കാര്‍ പൂര്‍ണമായും കൈയൊഴിഞ്ഞു. വീടുകളും കച്ചവടസ്ഥാപനങ്ങളും തകര്‍ന്നവരെ ഇരകളുടെ പട്ടികയില്‍ ഉള്‍പ്പെടുത്തിയതല്ലാതെ മറ്റു നടപടിക്രമങ്ങളൊന്നും നടന്നില്ല. പ്രധാന ആവശ്യമായിരുന്ന മരിച്ച കുടുംബങ്ങളിലുള്ളവര്‍ക്കു സര്‍ക്കാര്‍ ജോലി ഇപ്പോഴും ചുവപ്പു നാടയിലാണ്.
പൊടിക്കുണ്ട് രാജേന്ദ്രനഗര്‍ കോളനിയില്‍ മാര്‍ച്ച് 24നു രാത്രിയാണു സ്‌ഫോടകവസ്തുക്കള്‍ പൊട്ടിത്തെറിച്ച് നാടിനെ നടുക്കിയ സ്‌ഫോടനമുണ്ടായത്. അപകടത്തില്‍ അഞ്ചു വീടുകള്‍ പൂര്‍ണമായും 84 വീടുകളും ഭാഗികമായും തകര്‍ന്നു. സ്വകാര്യവ്യക്തിയുടെ അശ്രദ്ധമൂലമുണ്ടായ അപകടം തുടക്കത്തില്‍ സര്‍ക്കാര്‍തലത്തില്‍ വേണ്ട പരിഗണന നല്‍കാഞ്ഞതോടെ സംയുക്ത ആക്ഷന്‍ കമ്മിറ്റി രൂപീകരിച്ചിരുന്നു. കലക്ടറുടെ നിര്‍ദേശപ്രകാരം കോര്‍പറേഷന്‍ എന്‍ജിനിയര്‍മാര്‍ നടത്തിയ കണക്കെടുപ്പില്‍ 2.5 കോടി രൂപയുടെ നഷ്ടമുണ്ടെന്നു ചൂണ്ടിക്കാട്ടി സര്‍ക്കാരിനു റിപ്പോര്‍ട്ട് നല്‍കി. എന്നാല്‍ ഇതുവരെ അടിയന്തിരസഹായം പോലും പൊടിക്കുണ്ടില്‍ എത്തിയില്ല. രണ്ട് അപകത്തിലും നീതികിട്ടാത്ത ഇരകള്‍ പുതിയ സര്‍ക്കാരിനെ പ്രതീക്ഷയോടെ ഉറ്റുനോക്കുകയാണ്.