മലപ്പുറം: തമിഴ്‌നാട്ടില്‍നിന്നു വാങ്ങിയ കഞ്ചാവ് മലപ്പുറത്തേക്കു കാറില്‍ വില്‍പന നടത്താന്‍ വരുന്നതിനിടെ മഞ്ചേരി തുറക്കല്‍ ബൈപാസില്‍വച്ച് രണ്ടു പേര്‍ എക്‌സൈസിന്റെ പിടിയിലായി. ക്രിസ്മസ്-പുതുവര്‍ഷം പ്രമാണിച്ച് മലപ്പുറം എക്‌സൈസ് ഡെപ്യൂട്ടി കമ്മിഷണര്‍ അനില്‍കുമാറിന്റെ നേതൃത്വത്തില്‍ രൂപീകരിച്ചിട്ടുള്ള പ്രത്യേക സംഘം വാഹന പരിശോധന നടത്തവേ തുറക്കല്‍നിന്ന് ഓടിച്ചുവന്ന മാരുതി ആള്‍ട്ടോ 800 കാറിന്റെ മുന്‍സീറ്റുകള്‍ക്കടിയിലായി ഒളിപ്പിച്ചിരുന്ന കഞ്ചാവ് പിടികൂടുകയായിരുന്നു.
കാറില്‍ കഞ്ചാവ് കടത്തിക്കൊണ്ടുവന്ന അലനല്ലൂര്‍ തിരുവിഴാംകുന്ന് പൂക്കോടന്‍ വീട്ടില്‍ ഷൗക്കത്തലി (35), മണ്ണാര്‍ക്കാട് നെയ്യപ്പാടത്ത് നെയ്യപ്പാടത്ത് ലത്തീഫ് എന്നിവരാണ് അറസ്റ്റ് ചെയ്യപ്പെട്ടത്. വഴിയരികില്‍ പഴം, പച്ചക്കറി എന്നിവ വാഹനങ്ങളില്‍ വില്‍പന നടത്താറുള്ള ഇവര്‍ കമ്പം, പൊള്ളാച്ചി ഭാഗങ്ങളില്‍നിന്നാണ് കഞ്ചാവ് ശേഖരിക്കാറുള്ളത്. പ്രതി ലത്തീഫിന്റെ സഹോദരീ ഭര്‍ത്താവ് രണ്ടു മാസം മുന്‍പ് 12 കിലോ കഞ്ചാവുമായി വണ്ടൂരില്‍ പിടിയിലായിരുന്നു. പ്രതികളെ മഞ്ചേരി ജുഡീഷ്യല്‍ ഫസ്റ്റ്ക്ലാസ് മജിസ്‌ട്രേറ്റ് കോടതി മുന്‍പാകെ ഹാജരാക്കിയ പ്രതികളെ റിമാന്‍ഡ് ചെയ്തു. എക്‌സൈസ് ഇന്‍സ്‌പെക്ടര്‍ ടി. അശോക് കുമാര്‍, പ്രിവന്റീവ് ഓഫിസര്‍ ടി. ഷിജുമോന്‍, സിവില്‍ എക്‌സൈസ് ഓഫിസര്‍മാരായ കെ.എസ് അരുണ്‍കുമാര്‍, കെ.പി സാജിദ്, പി. സഫീറലി, എം.പി മുഹമ്മദലി എന്നിവരടങ്ങിയ ഡപ്യൂട്ടി കമ്മിഷണറുടെ സ്‌പെഷല്‍ സ്വക്വാഡ് അംഗങ്ങളാണ് പ്രതികളെ പിടികൂടിയത്. ഇതേസംഘം ഈ മാസംതന്നെ തിരുവാലിയില്‍വച്ച് കാറില്‍ കടത്തിയ വന്‍ മദ്യശേഖരം പിടികൂടിയിരുന്നു.