കൊച്ചി: കോടതികളില്‍ തുടരുന്ന മാധ്യമവിലക്ക് നീക്കാന്‍ ചീഫ് ജസ്റ്റിസ് മുന്‍കൈയെടുക്കണമെന്നു കേരള മീഡിയ അക്കാദമി ചെയര്‍മാന്‍ ആര്‍.എസ് ബാബു ആവശ്യപ്പെട്ടു.
സുപ്രീം കോടതി ചീഫ് ജസ്റ്റിസായിരുന്ന കേരളത്തിന്റെ ഗവര്‍ണര്‍ ജസ്റ്റിസ് പി. സദാശിവം പറഞ്ഞിട്ടുപോലും കോടതിയില്‍നിന്ന് അനുകൂല നടപടി ഉണ്ടാകാത്തതു നിര്‍ഭാഗ്യകരമാണ്. അഞ്ചുമാസമായി കോടതിയില്‍ മാധ്യമപ്രവര്‍ത്തര്‍ക്കു പ്രവേശിക്കാന്‍ കഴിയുന്നില്ല എന്നുവരുന്നത് ജുഡീഷ്യറിക്ക് നാണക്കേടാണ്. അഭിഭാഷകര്‍ ധാര്‍ഷ്ട്യമനോഭാവം ഉപേക്ഷിക്കണമെന്നും അദ്ദേഹം പറഞ്ഞു. എറണാകുളം പ്രസ്‌ക്ലബ്ബില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.
ഇ.എം.എസ് അടക്കമുള്ള പ്രഗത്ഭരുടെ പേരില്‍ മീഡിയ അക്കാദമി പ്രഭാഷണ പരമ്പരകള്‍ സംഘടിപ്പിക്കും. മീഡിയ അക്കാദമിയുടെ ദൃശ്യമാധ്യമ പുരസ്‌കാരം അടുത്തവര്‍ഷം മുതല്‍ അന്തരിച്ച പ്രമുഖ മാധ്യമപ്രവര്‍ത്തകന്‍ ടി.എന്‍ ഗോപകുമാറിന്റെ പേരിലാകും നല്‍കുകയെന്നും അദ്ദേഹം പറഞ്ഞു.