മുംബൈ: ഐ.പി.എല്ലില്‍ കാര്യമായ നേട്ടങ്ങളൊന്നും അവകാശപ്പെടാനില്ലാത്ത കിങ്‌സ് ഇലവന്‍ പഞ്ചാബ് പുതിയ പരിശീലകനായി മുന്‍ ഇന്ത്യന്‍ ഓപണര്‍ വീരേന്ദര്‍ സെവാഗിനെ നിയമിച്ചേക്കുമെന്നു റിപ്പോര്‍ട്ടുകള്‍. സഞ്ജയ് ബംഗാറിനു പകരമാണ് സെവാഗിന്റെ നിയമനം. കഴിഞ്ഞ രണ്ടു സീസണുകളിലായി ടീമിന്റെ ഉപദേശക സ്ഥാനത്ത് പ്രവര്‍ത്തിച്ചു വരികയായിരുന്നു സെവാഗ്. വരുന്ന ഐ.പി.എല്‍ സീസണില്‍ സെവാഗിന്റെ പരിശീലനത്തിലാകും ടീം കളിക്കാനിറങ്ങുക.
2014ലാണ് ബംഗാര്‍ കിങ്‌സ് ഇലവന്‍ പരിശീലകനായത്. ആ സീസണില്‍ ടീമിനെ ആദ്യമായി ഫൈനല്‍ വരെയെത്തിക്കാന്‍ ബംഗാറിനു സാധിച്ചിരുന്നു. എന്നാല്‍ പിന്നീടുള്ള രണ്ടു സീസണുകളിലും ടീമിനു കാര്യമായ നേട്ടങ്ങളുണ്ടായില്ല. 2014ല്‍ കിങ്‌സ് ഇലവനെ ഫൈനലിലെത്തിച്ച മികവിന്റെ അടിസ്ഥാനത്തിലാണ് ബംഗാറിനെ ഇന്ത്യന്‍ ദേശീയ ടീമിന്റെ അസിസ്റ്റന്റ് പരിശീലകനായി നിയമിച്ചത്. ആ സ്ഥാനത്ത് ഇപ്പോഴും തുടരുകയാണ് മുന്‍ ഇന്ത്യന്‍ താരം.