തിരുവനന്തപുരം: ലോകമെമ്പാടുമുള്ള മലയാളികള്‍ക്ക് ഗവര്‍ണര്‍ പി. സദാശിവവും മുഖ്യമന്ത്രി പിണറായി വിജയനും, പ്രതിപക്ഷ നേതാവ് രമേശ് ചെന്നിത്തലയും, കെ.പി.സി.സി പ്രസിഡന്റ് വി.എം സുധീരനും ക്രിസ്മസ് ആശംസകള്‍ നേര്‍ന്നു. സ്‌നേഹത്തിന്റെയും അനുകമ്പയുടെയും ക്ഷമാശീലത്തിന്റെയും ശാശ്വതചൈതന്യം ക്രിസ്മസ് ആഘോഷങ്ങളില്‍ പ്രതിഫലിക്കട്ടെയെന്ന് ഗവര്‍ണര്‍ പറഞ്ഞു. സമാധാനവും ഐശ്വര്യവും സന്തോഷവും നല്‍കി ക്രിസ്മസ് എല്ലാവരെയും അനുഗ്രഹിക്കട്ടെയെന്നും അദ്ദേഹം ആശംസാ സന്ദേശത്തില്‍ അറിയിച്ചു.

നന്മയുടെയും ശാന്തിയുടെയും സന്തോഷത്തിന്റെയും ആഘോഷവേളയാണ്ക്രിസ്മസെന്ന് മുഖ്യമന്ത്രി പറഞ്ഞു. സ്‌നേഹത്തിന്റെയും, സമാധാനത്തിന്റെയും സമഭാവനയുടെയും പ്രതീകമായ തിരുപ്പിറവിദിനം നമുക്കെല്ലാവര്‍ക്കും ആത്മവിശുദ്ധിയുടെ നിമിഷങ്ങള്‍ പ്രദാനം ചെയ്യട്ടെയെന്ന് പ്രതിപക്ഷ നേതാവ് രമേശ് ചെന്നിത്തല ആശംസിച്ചു. സമാധാനത്തിന്റെയും മനുഷ്യസ്‌നേഹത്തിന്റെയും നന്മയുടേയും കാരുണ്യത്തിന്റെയും ഉല്‍കൃഷ്ടമായ സന്ദേശം ജനഹൃദയങ്ങളില്‍ എത്തിക്കുന്നതിന് കുട്ടായി പ്രവര്‍ത്തിക്കാന്‍ പ്രതിജ്ഞ പുതുക്കാനുള്ള മഹത്തായ സുദിനമാണ് ക്രിസ്മസെന്ന് സുധീരന്‍ പറഞ്ഞു.