തിരുവനന്തപുരം: പ്രതിപക്ഷത്തിനെതിരെയുള്ള കെ.മുരളീധരന്റെ പ്രസ്താവന പോസിറ്റീവായി കാണുമെന്ന് പ്രതിപക്ഷ നേതാവ് രമേശ് ചെന്നിത്തല.യുഡിഎഫ് കേന്ദ്ര- സംസ്ഥാന സര്‍ക്കാരുകളുടെ ജനദ്രോഹ നയങ്ങള്‍ക്കെതിരേ സമരം ശക്തമാക്കണമെന്നാണ് മുരളീധരന്‍ ഉദ്ദേശിച്ചതെന്നും അതിനെ സ്വാഗതം ചെയ്യുന്നുവെന്നും ചെന്നിത്തല പറഞ്ഞു.

അദ്ദേഹം മുതിര്‍ന്ന നേതാവാണ്. മുന്‍ കെ.പി.സി.സി പ്രസിഡന്റാണ്.അദ്ദേഹം പറഞ്ഞതിന്റെ ഉ്‌ദ്ദേശശുദ്ധി പൂര്‍ണമായും ഉള്‍ക്കൊള്ളാന്‍ കഴിഞ്ഞിട്ടുണ്ട്.പുതിയ സര്‍ക്കാരിന് ആദ്യ ആറ് മാസം സാവകാശം നല്‍കുകയാണ് പ്രതിപക്ഷത്തിരിക്കുമ്പോള്‍ യു.ഡി.എഫിന്റെ നയം. യു.ഡി.എഫില്‍ ആരുമായും അഭിപ്രായ വ്യത്യാസമില്ലെന്നും അദ്ദേഹം പറഞ്ഞു.

അതുപോലെ തന്നെ മുസ്‌ലിം ലീഗ് നേതാവ് ഇ.ടി.മുഹമ്മദ് ബഷീറിന്റെയും വിമര്‍ശനത്തെ പോസിറ്റീവായി കാണുന്നുവെന്നും യുഡിഎഫ് ഒറ്റക്കെട്ടായി മുന്നോട്ടുപോകുന്നുവെന്നും ചെന്നിത്തല കൂട്ടിച്ചേര്‍ത്തു.

സർക്കാരിനെതിരായ സമര പരിപാടികൾ ആലോചിക്കാൻ ജനുവരി മൂന്നിന് യുഡിഎഫ് യോഗം ചേരുന്നുണ്ട്.