റിയാദ്: ഭരണകൂട ഭീകരതയുടെ ഇരകളായി തുല്യതയില്ലാത്ത പീഡനം അനുഭവിക്കുന്ന സിറിയന്‍ ജനതയ്ക്ക് സഹായഹസ്തവുമായി സഊദി അറേബ്യ. സിറിയയ്ക്ക് സഹായമേകാനായി രാജ്യവ്യാപക കാംപയിന്‍ നടത്താന്‍ സഊദി ഭരണാധികാരി സല്‍മാന്‍ രാജാവാണ് ഉത്തരവിട്ടത്. രാജ്യത്തെ പൗരന്മാരും വിദേശികളും അലെപ്പോ ഫണ്ടിലേക്ക് സഹായം നല്‍കണമെന്ന് അദ്ദേഹം പറഞ്ഞു.
100 ദശലക്ഷം സഊദി റിയാല്‍ നല്‍കണമെന്നാണ് ലക്ഷ്യമിടുന്നത്. സിറിയന്‍ ജനതയ്ക്കുള്ള ഭക്ഷണം, അഭയം, മരുന്ന്, ചികിത്സ, താല്‍കാലിക ടെന്റ് നിര്‍മാണം തുടങ്ങിയ അവശ്യസാധനങ്ങള്‍ക്കാണ് തുക ചെലവഴിക്കുക. കാംപയിനിന്റെ ആദ്യപടിയായി സല്‍മാന്‍ രാജാവ് തന്നെ 20 ദശലക്ഷം റിയാല്‍ ഫണ്ടിലേക്ക് സംഭാവന ചെയ്തു. കൂടാതെ കിരീടാവകാശി മുഹമ്മദ് ബിന്‍ നാഇഫും, ഉപ കിരീടാവകാശി മുഹമ്മദ് ബിന്‍ സല്‍മാനും ഫണ്ടിലേക്ക് സംഭാവന നല്‍കി.