ദമ്മാം: സഊദിയിൽ പുതിയ നോട്ടുകളെത്തി. പഴയ നോട്ടുകള്‍ക്ക് പകരം പുതിയ നോട്ടുകളായിരിക്കും ഘട്ടം ഘട്ടമായി ഇനി മുതല്‍ രാജ്യത്ത് ഇടപാടുകള്‍ക്ക് ഉപയോഗിച്ചു തുടങ്ങുക. എന്നാല്‍ പഴയ നോട്ടുകള്‍ പെട്ടെന്ന് അസാധുവാക്കി ജനങ്ങൾക്ക് പ്രയാസമുണ്ടാവാത്ത രീതിയിലാണ് സഊദി അറേബ്യ പഴയ നോട്ടുകള്‍ പിന്‍വലിക്കുന്നത്. 

സഊദി ഭരണാധികാരി സൽമാൻ രാജാവിന്റെ ചിത്രങ്ങൾ ആലേഖനം ചെയ്ത പുതിയ നോട്ടുകളും നാണയങ്ങളുമാണ്  സഊദി കേന്ദ്ര ബാങ്കായ ‘സാമ’ പുറത്തിറക്കിയത്. സഊദി കറൻസിയുടെ ആറാമത് പതിപ്പായി ഇറങ്ങിയ പുതിയ നോട്ടുകൾ ലോകോത്തര ഗുണ നിലവാരം കാത്തു സൂക്ഷിക്കുന്നതും അതീവ സുരക്ഷാ മാനദണ്ഡങ്ങളും ഉൾക്കൊള്ളുന്നതാണ്. പുതിയ നോട്ടുകളോടൊപ്പം നാണയങ്ങളിലും പരിഷ്ക്കാരങ്ങൾ വരുത്തിയിട്ടുണ്ട്. 2 റിയാലിന്റെയും 1 റിയാലിന്റെയും നാണയങ്ങൾക്ക് പുറമേ 50 ഹലാല (പൈസ), 25 ഹലാല, 10 ഹലാല , 5 ഹലാല 1 ഹലാല എന്നിവയും സാമ പുറത്തിറക്കിയവയിൽ പെടുന്നു. ഇതോടനുബന്ധിച്ച് 1 റിയാലിന്റെ നോട്ടുകൾ പ്രിന്റ് ചെയ്യുന്നത് സാമ നിർത്തലാക്കുകയും ചെയ്തു.

പഴയ നോട്ടുകൾ ഇപ്പോഴും രാജ്യത്ത് സാധുവാണ്. ഘട്ടം ഘട്ടമായാണ് ഇവ  പിൻ വലിക്കുക. ജനങ്ങള്‍ക്ക് പ്രയാസമുണ്ടാവാത്ത രീതിയിലാണ് സഊദി അറേബ്യ പഴയ നോട്ടുകള്‍ പിന്‍വലിക്കുന്നത്. പഴയ നോട്ടുകള്‍ അപ്രത്യക്ഷമാകുവാന്‍ ഏകദേശം അഞ്ച് വര്‍ഷമെങ്കിലും എടുക്കുമെന്നാണ് കരുതുന്നത്. ബാങ്കുകൾ, സർക്കാർ ഓഫീസുകൾ, മറ്റു പൊതു ജനം കൂടുതലായി ഉപയോഗിക്കുന്ന കേന്ദ്രങ്ങൾ എന്നിവിടങ്ങളിൽ ഇടപാടുകൾ നടത്തുമ്പോൾ തിരിച്ചു നൽകുക പുതിയ നോട്ടുകളായിരിക്കും.