ന്യൂഡല്‍ഹി: കള്ളപ്പണം മാറ്റി നല്‍കാന്‍ സഹായിച്ചതുമായി ബന്ധപ്പെട്ട് കൊട്ടക് മഹീന്ദ്ര ബാങ്ക് മാനേജര്‍ അറസ്റ്റില്‍. ന്യൂഡല്‍ഹി കെ.ജി മാര്‍ഗ് ബ്രാഞ്ച് മാനേജരെയാണ് എന്‍ഫോഴ്‌സ്‌മെന്റ് ഡയറക്ടറേറ്റ് അറസ്റ്റ് ചെയ്തത്. കള്ളപ്പണം വെളുപ്പിക്കല്‍ നിരോധന നിയമ പ്രകാരമാണ് ഇയാള്‍ക്കെതിരേ കേസ് രജിസ്റ്റര്‍ ചെയ്തിട്ടുള്ളത്.
കൊല്‍ക്കത്ത ആസ്ഥാനമായ ബിസിനസുകാരന്‍ പരസ്മാള്‍ ലോധ, ഡല്‍ഹി ആസ്ഥാനമായ അഭിഭാഷകന്‍ രോഹിത് ടന്‍ഡന്‍ എന്നിവരെ കള്ളപ്പണം വെളുപ്പിക്കാന്‍ ശ്രമിച്ച കേസില്‍ നേരത്തെ അറസ്റ്റ് ചെയ്തിരുന്നു. രമേശ് ചന്ദ്, രാജ് കുമാര്‍ എന്നീ പേരുകളിലെ ഒമ്പത് വ്യാജ അക്കൗണ്ടുകളിലായി 34 കോടി രൂപയുടെ കള്ളനോട്ടുകള്‍ ഇരുവരും ചേര്‍ന്ന് മാറ്റിയെടുത്തിരുന്നു.
പുതിയ 500, 2000 നോട്ടുകളായാണ് പണം മാറ്റിയെടുത്തത്. ഇവരെ സഹായിച്ചത് കൊട്ടക് മഹീന്ദ്ര ബാങ്ക് മാനേജര്‍ ആയിരുന്നുവെന്ന് എന്‍ഫോഴ്‌സ്‌മെന്റ് കണ്ടെത്തിയിരുന്നു. എന്നാല്‍, വ്യാജ അക്കൗണ്ടുകള്‍ ഉണ്ടെന്ന ആരോപണം നിഷേധിച്ച കൊട്ടക് മഹീന്ദ്ര ബാങ്ക് അധികൃതര്‍, അന്വേഷണ ഏജന്‍സിയോട് പൂര്‍ണമായി സഹകരിക്കുമെന്ന് അറിയിച്ചു.