മക്ക: കഴിഞ്ഞ വര്‍ഷം ഹജ്ജ് സമയത്ത് നടന്ന ക്രെയിന്‍ ദുരന്തത്തില്‍ വിചാരണ നടപടികള്‍ മക്ക ക്രിമിനല്‍ കോടതിയില്‍ പുരോഗമിക്കുന്നു. കേസില്‍ പിടിക്കപ്പെട്ടവരില്‍ ക്രെയിന്‍ ഉപയോഗിക്കാന്‍ മതിയായ ലൈന്‍സ് ഇല്ലാത്തവരായിരുന്നു ഇവ കൈകാര്യം ചെയ്തവരെന്ന് കോടതിയില്‍ വ്യക്തമായി.

വിവിധ വകുപ്പുകളുമായി സഹകരിച്ച് നടത്തുന്ന വിചാരണ കോടതിയിലാണ് ഇത് വ്യക്തമായത്.
ക്രെയിന്‍ ഉപയോഗിക്കുന്നതിനെ കുറിച്ച് വ്യക്തമായ അറിവ് ഇല്ലാത്തവരായിരുന്നു ഇത് കൈകാര്യം ചെയ്തിരുന്നതെന്ന് എഞ്ചിനീയര്‍മാരില്‍ ഒരാള്‍ വെളിപ്പെടുത്തിയതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.

അതേ സമയം, പ്രത്യേക കോടതിയില്‍ നടക്കുന്ന വിചാരണയില്‍ ഇതു മാത്രമാണ് ലംഘനമായി കണ്ടെത്തിയതെന്നാണ് അറിയുന്നത്. ക്രെയിനിന്റെ നിര്‍മാണം മുതല്‍ വിവിധ ഭാഗങ്ങളും മുഴുവന്‍ രേഖകളും എഞ്ചിനിയറിംഗ് ഭാഗങ്ങളും പരിശോധനക്കും വിചാരണക്കും വിധേയമാക്കിയിരുന്നു. കേസിന്റെ വിധി ഏതാനും ദിവസങ്ങള്‍ക്കുള്ളില്‍ പുറപ്പെടുവിക്കുമെന്നാണ് കരുതുന്നത്.

അന്വേഷണം നടത്തുന്ന ഇന്‍വെസ്റ്റിഗേഷന്‍ ആന്‍ഡ് പബ്ലിക് പ്രോസിക്യൂഷന്‍ ( ബി ഐ പി) ഇവിടെ കരാര്‍ ഏറ്റെടുത്ത് നടത്തുന്ന സഊദി ബിന്‍ലാദന്‍ കമ്പനിയിലെ ക്രെയിനുമായി ബന്ധപ്പെട്ട എഞ്ചിനീയര്‍മാര്‍, ടെക്‌നീഷ്യന്‍, തൊഴിലാളികള്‍ എന്നിവരില്‍ നിന്നായി 170 പേരെ ചോദ്യം ചെയ്തിരുന്നു. ഹറമിലെ പരിസരങ്ങളിലെ ക്രെയിനുകളുമായി ബന്ധപ്പെട്ട കമ്പനികളിലെ ഉന്നതര്‍ തമ്മില്‍ കൈമാറ്റം ചെയ്ത ഇ-മെയില്‍, മറ്റു ഡോക്യുമെന്റുകള്‍ എന്നിവ അന്വേഷണ ഉദ്യോഗസ്ഥര്‍ പരിശോധിച്ചിരുന്നു.

പ്രദേശത്തെ കാലാവസ്ഥ വിശകലനവും നടത്തിയാണ് അന്വേഷണം നടത്തിയത്. 200 മീറ്റര്‍ ഉയരവും 1350 ടണ്‍ ഭാരവുമുള്ള ക്രെയിനാണ് 2015 ഹജജിനു തൊട്ടു മുന്‍പത്തെ ദിവസം കനത്ത മഴയിലും കാറ്റിലും തകര്‍ന്നു വീണത്. 111 തീര്‍ത്ഥാടകരാണ് ദുരന്തത്തില്‍ മരിച്ചത്.