പൂനെ: ബേക്കറിയിലുണ്ടായ തീപ്പിടുത്തത്തില്‍ ആറ് തൊഴിലാളികള്‍ മരിച്ചു. പൂനെയില്‍ കോന്ദ്‌വ മേഖലയിലെ ബേക്ക്‌സ് ആന്‍ഡ് കേക്ക്‌സ് എന്ന ബേക്കറിയില്‍ ഇന്നലെ പുലര്‍ച്ചെയാണ് തീപ്പിടുത്തമുണ്ടായത്. ഷോര്‍ട്ട് സര്‍ക്യൂട്ടാണ് തീപ്പിടുത്തത്തിന് കാരണമെന്ന് അഗ്നിശമനസേനാംഗങ്ങള്‍ വ്യക്തമാക്കി. കടയ്ക്കകത്ത് ഉറങ്ങുകയായിരുന്ന ബേക്കറി തൊഴിലാളികളായ ഇര്‍ഷാദ് ഖാന്‍, ഷാനു അന്‍സാരി, സാകിം, ഫാഹിം അന്‍സാരി, ജുനൈദ് അന്‍സാരി, നിഷാന്‍ അന്‍സാരി എന്നിവരാണ് മരിച്ചത്. ഇവരെല്ലാം ഉത്തര്‍പ്രദേശ് സ്വദേശികളാണ്.
സംഭവത്തില്‍ മൂന്നു പേരെ പൊലിസ് ചോദ്യം ചെയ്തിട്ടുണ്ട്. പുലര്‍ച്ചെ 4.45ഓടെ കണ്‍ട്രോള്‍ റൂമില്‍ നിന്ന് അടിയന്തര സന്ദേശം ലഭിച്ചതിനെ തുടര്‍ന്നാണ് അഗ്നിശമനസേനാംഗങ്ങള്‍ ബേക്കറിയിലെത്തിയത്. എന്നാല്‍ കട പൂട്ടി കിടക്കുന്നതിനാല്‍ ഇവര്‍ക്ക് അകത്ത് കടക്കാനായില്ല. ബേക്കറി ഉടമസ്ഥന്‍ എത്തിയശേഷമാണ് തുറന്നത്. ഉറങ്ങി കിടന്ന തൊഴിലാളികള്‍ ശ്വാസം മുട്ടിയാണ് മരിച്ചതെന്ന് പൊലിസ് പറഞ്ഞു.