കോഴിക്കോട്: നഗരത്തിലെ ബീച്ച് ആശുപത്രിക്ക് സമീപം സംഘര്‍ഷം. രണ്ടു പേര്‍ക്ക് പരുക്കേറ്റു. ഇന്നലെ രാത്രി പത്തോടെയാണ് സംഭവം. ആശുപത്രിക്കു സമീപത്തെ ഹോട്ടലില്‍ ഭക്ഷണം കഴിച്ചതിനെ തുടര്‍ന്നുണ്ടായ തര്‍ക്കമാണ് അക്രമത്തില്‍ കലാശിച്ചത്. ഗുരുതരമായി പരുക്കേറ്റ തലക്കുളത്തൂര്‍ അണ്ടിക്കോട് പടിഞ്ഞാറെ കുനിയില്‍ റോഷിന്‍ ഷിനിത്തിനെ (26) കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. റോഷിനെ രക്ഷിക്കാന്‍ ശ്രമിക്കുന്നതിനിടെ സുഹൃത്ത് മുസ്തഫ(36)യ്ക്കും പരുക്കേറ്റു. കത്തി ഉപയോഗിച്ച് ഇരുവരെയും മാരകമായി പരുക്കേല്‍പ്പിച്ച കൊല്ലം സ്വദേശി ഷാജഹാനെ(52) സംഭവസ്ഥലത്തുനിന്നു വെള്ളയില്‍ പൊലിസ് അറസ്റ്റ് ചെയ്തു.
റോഷിന്റെ വയറിനാണ് കുത്തേറ്റത്. കുടല്‍മാല പുറത്തുവന്ന നിലയില്‍ മുറിവേറ്റ ഇയാളെ ആദ്യം ബീച്ച് ഗവ. ആശുപത്രിയില്‍ പ്രവേശിപ്പിച്ച് പ്രാഥമിക ചികിത്സ നല്‍കി. തുടര്‍ന്ന് മെഡിക്കല്‍ കോളജ് ആശുപത്രിയിലേക്കു മാറ്റുകയായിരുന്നു.