കോഴിക്കോട്: ഇരു മുജാഹിദ് വിഭാഗങ്ങളും പരസ്പരം ഐക്യപ്പെട്ടെങ്കിലും അടിസ്ഥാന വിഷയങ്ങളില്‍ ഇപ്പോഴും അഭിപ്രായ വ്യത്യാസം തുടരുന്നു. ഐക്യ തീരുമാനത്തിന് ശേഷം പുറത്തിറങ്ങിയ ഇരു വിഭാഗത്തിന്റെയും ഔദ്യോഗിക പ്രസിദ്ധീകരണങ്ങളിലാണ് തങ്ങളുടെ പഴയ വാദമുഖങ്ങള്‍ അതേപടി നിലനില്‍ക്കുന്നുവെന്ന് തെളിയിക്കുന്ന ലേഖനങ്ങള്‍ പ്രസിദ്ധീകരിച്ചിരിക്കുന്നത്.

അഭൗതിക സൃഷ്ടികളായ ജിന്ന്, പിശാച് വര്‍ഗങ്ങള്‍ക്ക് ഉപകാരവും ഉപദ്രവവും വരുത്താനാകുമോ ഇല്ലയോ എന്നതായിരുന്നു മുജാഹിദു വിഭാഗങ്ങള്‍ക്കിടയിലെ തര്‍ക്കങ്ങളില്‍ പ്രധാനപ്പെട്ടത്. അദൃശ്യനായ പിശാച് മനുഷ്യന് ഉപദ്രവം വരുത്തുന്നതിന്റെ ഫലമായാണ് സിഹ്‌റ് (മാരണം) ഫലിക്കുന്നത്. പ്രവാചകന് ജൂതമത വിശ്വാസിയായ ലബീദ് മാരണം ചെയ്‌തെന്നും അത് പ്രവാചകന് ബാധിച്ചുവെന്നുമായിരുന്നു ഔദ്യോഗിക മുജാഹിദ് വിഭാഗം വിശ്വസിച്ചിരുന്നത്. എന്നാല്‍, ഒരു കാരണവശാലും പിശാചിന് മാത്രമല്ല ഒരു സൃഷ്ടിക്കും അദൃശ്യമായി മനുഷ്യനെ ഉപദ്രവിക്കാനാവില്ലെന്നും നബിയെ ജൂതന്‍ മാരണം വഴി ഉപദ്രവിച്ചുവെന്ന് വിശ്വസിക്കല്‍ ശിര്‍ക്ക് (ബഹുദൈവ വിശ്വാസം) ആണെന്നുമാണ് മടവൂര്‍ വിഭാഗം വാദിച്ചിരുന്നത്.
ഇരു വിഭാഗവും ഐക്യപ്പെട്ടെങ്കിലും ഇത്തരം അടിസ്ഥാനവിഷയങ്ങളില്‍ തീര്‍പ്പ് കല്‍പ്പിക്കാനായില്ലെന്ന ആരോപണത്തിന് ശക്തി പകരുന്നതാണ് ഇരു ഗ്രൂപ്പിന്റെയും ലയന തീരുമാന ശേഷം ആനുകാലികങ്ങളില്‍ വന്ന ലേഖനങ്ങള്‍. മാരണം ചെയ്ത് നബിയെ ഉപദ്രവിച്ചുവെന്ന് വിശ്വസിക്കല്‍ ശിര്‍ക്കാണെന്ന് ലയന പ്രഖ്യാപന ശേഷം പുറത്തിറങ്ങിയ മടവൂര്‍ വിഭാഗത്തിന്റെ വാരിക (ശബാബ് 23.12.16) ഉറപ്പിച്ചു പറയുന്നു. എന്നാല്‍, ഇരുവിഭാഗങ്ങളും ലയനതീരുമാനമെടുത്ത ശേഷം പുറത്തിറങ്ങിയ കെ.എന്‍.എം മുഖപത്രം (അല്‍മനാര്‍ 1.12.16) മാരണം ഫലിക്കുമെന്നും അതിന് പ്രതിഫലനമുïാകുമെന്നും വ്യക്തമാക്കിയിരുന്നു. ഇതെല്ലാം ഐക്യതീരുമാനമെടുത്ത ശേഷമാണ്. ഇരുവിഭാഗങ്ങളും അവരവരുടെ പഴയ നിലപാടില്‍ ഉറച്ചു നില്‍ക്കുമ്പോള്‍ പ്രവര്‍ത്തകര്‍ കടുത്ത ആശയക്കുഴപ്പത്തിലാണ്. ഇസ്്‌ലാമിന്റെ അടിസ്ഥാനപരമായ ഏകദൈവ വിശ്വാസത്തില്‍ നിന്നും ഔദ്യോഗിക വിഭാഗം വ്യതിചലിച്ചുവെന്നു തന്നെയാണ് ലയന പ്രഖ്യാപന ശേഷവും പുറത്തിറങ്ങിയ മടവൂര്‍ വിഭാഗം മുഖപത്രം ആരോപിക്കുന്നത്. ആശയ പ്രചാരണ രംഗത്ത് ആരോപണ പ്രത്യാരോപണങ്ങള്‍ ഉയരുന്നതില്‍ നേതൃത്വം കടുത്ത ആശയക്കുഴപ്പത്തിലാണ്.