ബഗ്ദാദ്: ഇറാഖില്‍ കമ്പോളത്തിലുണ്ടായ ഇരട്ടസ്‌ഫോടനങ്ങളില്‍ 28 പേര്‍ കൊല്ലപ്പെട്ടു. ഐ.എസാണ് ആക്രമണം നടത്തിയതെന്ന് പൊലിസ് പറഞ്ഞു. തിരക്കേറിയ അല്‍ സിനാക് മാര്‍കറ്റിലാണ് സ്‌ഫോടനമുണ്ടായത്. 50 ലേറെ പേര്‍ക്ക് പരുക്കേറ്റു. കാറുകളുടെ സ്‌പെയര്‍ പാര്‍ട്‌സ് വില്‍ക്കുന്ന ഷോപ്പിന് സമീപത്തെ റോഡിലാണ് ബോംബ് സ്ഥാപിച്ചിരുന്നത്. ഇവിടെയെത്തിയ മറ്റൊരു ചാവേര്‍ സ്വയം പൊട്ടിത്തെറിച്ചു. തുടര്‍ന്ന് നേരത്തെ കൊണ്ടുവച്ച ബോംബും പൊട്ടി.
ശീഈ മേഖലയിലാണ് സ്‌ഫോടനമെന്നും നിരവധി പേര്‍ മരിച്ചെന്നും ദൃസാക്ഷി പറഞ്ഞു. രാവിലെ കാര്‍ ഷോപ്പിനു സമീപം പ്രഭാതഭക്ഷണ കച്ചവടം നടത്തുന്നവരും വാങ്ങാനെത്തിയവരുമാണ് മരിച്ചത്.
കഴിഞ്ഞ നവംബറില്‍ ശീഈ തീര്‍ഥാടകര്‍ സഞ്ചരിച്ച ട്രക്കിനു നേരെയുണ്ടായ ആക്രമണത്തില്‍ 77 പേര്‍ കൊല്ലപ്പെട്ടിരുന്നു. ജൂലൈയില്‍ ഷോപ്പിങ് സെന്ററിനു നേരേയുണ്ടായ ആക്രമണത്തിലും 281 പേര്‍ കൊല്ലപ്പെട്ടു. ഇരു ആക്രമണങ്ങളുടെയും ഉത്തരവാദിത്വം ഐ.എസ് ഏറ്റെടുത്തിരുന്നു.