കോഴിക്കോട്: എഴുത്തുകാരെയും സാംസ്‌കാരിക നായകന്‍മാരെയും നിശബ്ദരാക്കാനുള്ള ഏത് നീക്കത്തെയും ചെറുക്കുമെന്ന് മുസ്‌ലിം യൂത്ത് ലീഗ് സംസ്ഥാന പ്രസിഡന്റ് പാണക്കാട് സയ്യിദ് മുനവ്വറലി ശിഹാബ് തങ്ങള്‍. എം.ടി വാസുദേവന്‍ നായരുടെ വസതിയിലെത്തി സംഘ്പരിവാര്‍ ഭീഷണിക്കെതിരേ മുസ്്‌ലിം യൂത്ത്‌ലീഗിന്റെ പിന്തുണ അറിയിച്ച ശേഷം പ്രതികരിക്കുകയായിരുന്നു മുനവ്വറലി തങ്ങള്‍. മുസ്‌ലിം യൂത്ത് ലീഗ് സംസ്ഥാന ജനറല്‍ സെക്രട്ടറി പി.കെ ഫിറോസ്, ട്രഷറര്‍ എം.എ സമദ്, സീനിയര്‍ വൈസ് പ്രസിഡന്റ് നജീബ് കാന്തപുരം തുടങ്ങിയവരും ഒപ്പമുണ്ടായിരുന്നു.