മഞ്ചേരി: മുള്ളമ്പാറ കള്ളാടിക്കുന്നില്‍ അടിക്കാടിനു തീപിടിച്ചു. നാട്ടുകാരുടെയും ഫയര്‍ഫോഴ്‌സിന്റെയും ഒന്നര മണിക്കൂര്‍ നീണ്ട ശ്രമത്തിനൊടുവിലാണ് തീ നിയന്ത്രണവിധേയമായത്. ഇന്നലെ ഉച്ചയ്ക്ക് പന്ത്രണ്ടോടെയായിരുന്നു സംഭവം. തീ കണ്ട ഉടനെ മഞ്ചേരിയില്‍നിന്ന് അഗ്‌നിശമന സേന എത്തിയെങ്കിലും യൂനിറ്റിന് കുന്നിനു മുകളിലേക്ക് കയറാനായില്ല. തുടര്‍ന്നു നാട്ടുകാരുടെ നേതൃത്വത്തില്‍ തൊട്ടടുത്ത വീടുകളിലെ ടാങ്കില്‍നിന്നു വെള്ളം പമ്പുചെയ്ത് തീയണയ്ക്കുകയായിരുന്നു. മഞ്ചേരി അഗ്‌നിശമന യൂനിറ്റിലെ ഫയര്‍മാന്മാരായ കെ. മുഹമ്മദ് കുട്ടി, പി.പി അബ്ദുല്‍ ഷമീം, രഘുരാജന്‍, കുട്ടികൃഷ്ണന്‍ എന്നിവരും പങ്കെടുത്തു.