കൊല്ലം: ക്ഷേത്രത്തിലെ ഉച്ചഭാഷിണിയുടെ ശബ്ദം കുറയ്ക്കാന്‍ ആവശ്യപ്പെട്ട പരിസരവാസിയെ ശാന്തിക്കാരന്‍ തോക്കുകൊണ്ട് തലക്കടിച്ച് ഗുരുതരമായി പരുക്കേല്‍പ്പിക്കുകയും വെടിവയ്ക്കാന്‍ ശ്രമിക്കുകയും ചെയ്തതായി പരാതി. ഇരവിപുരം തെക്കേവിള പുത്തന്‍നട നഗര്‍ 144 തംബുരുവില്‍ ബാബുരാജന്‍നാ(68)ണ് പരുക്കേറ്റത്. ഇന്നലെ വൈകിട്ട് നാലേകാലോടെയായിരുന്നു സംഭവം. ബാബുരാജന്റെ വീടിനടുത്തുള്ള ക്ഷേത്രത്തില്‍ നിന്നും ഉച്ചഭാഷിണിയിലൂടെ വലിയ ശബ്ദം പുറത്തേക്ക് വരുന്നതിനാല്‍ ശബ്ദം കുറക്കുവാന്‍ മൈക്കിന്റെ ചുമതലയുള്ള ശാന്തിക്കാരനോട് ഇദ്ദേഹം ആവശ്യപ്പെട്ടിരുന്നു. ഇതിന്റെ ദേഷ്യത്തിലാണ് തന്റെ ഉറക്കം കെടുത്തിയെന്നാരോപിച്ച് കൈയില്‍ കരുതിയിരുന്ന തോക്കെടുത്ത് ശാന്തിക്കാരന്‍ ഇയാളുടെ തലക്ക് അടിച്ചതെന്ന് പൊലിസ് പറഞ്ഞു. അടിച്ചശേഷം തോക്കെടുത്ത് വെടിവയ്ക്കാന്‍ ശ്രമം നടത്തുന്നതിനിടെ ബാബുരാജന്‍ ശാന്തിക്കാരനില്‍ നിന്നും മല്‍പ്പിടുത്തത്തിലുടെ തോക്ക് പിടിച്ചു വാങ്ങി.
സംഭവമറിഞ്ഞ് ഓടിയെത്തിയ നാട്ടുകാര്‍ ചേര്‍ന്ന് ഇദ്ദേഹത്തെ ജില്ലാ ആശുപത്രിയില്‍ പ്രവേശിപ്പിച്ചു. ഇരവിപുരം എസ്.ഐയുടെ നേതൃത്വത്തില്‍ പൊലിസ് സംഘം സ്ഥലത്തെത്തി ശാന്തിക്കാരനായി തിരച്ചില്‍ ആരംഭിച്ചു. പൊലിസ് സംഘം തോക്ക് കസ്റ്റഡിയിലെടുത്തു. എയര്‍ഗണ്‍ ഉപയോഗിച്ചായിരുന്നു ആക്രമണം നടത്തിയതെന്നാണ് വിവരം.