ഒറ്റത്തറ: പാട്ടുപാറകുളമ്പ എ.എം.എല്‍.പി സ്‌കൂളില്‍ വിദ്യാര്‍ഥികളുടെ വിഷരഹിത ജൈവ പച്ചക്കറി വിളവെടുത്തു. കോഡൂര്‍ ഗ്രാമപ്പഞ്ചായത്ത് കൃഷിഭവന്റെ സഹകരണത്തോടെ പയര്‍, വഴുതന, വെണ്ട, മുളക് തുടങ്ങിയ പച്ചക്കറികളാണ് കൃഷി ഇറക്കിയിട്ടുള്ളത്. സംസ്ഥാന കൃഷിവകുപ്പിന്റെ സാമ്പത്തിക സഹായത്തോടെയുള്ള ഈ വര്‍ഷത്തെ 'പച്ചക്കറികൃഷി വികസനപദ്ധതി' യില്‍ ഉള്‍പ്പെടുത്തിയാണ് സ്‌കൂള്‍ പരിസരത്ത് പച്ചക്കറിക്കൃഷി ചെയ്തിട്ടുള്ളത്. സ്‌കൂളിലെ ഉച്ചഭക്ഷണത്തിന് ആവശ്യമായ വിഷരഹിത പച്ചക്കറി തോട്ടത്തില്‍ നിന്ന് ലഭിക്കുന്നുണ്ട്. പ്രഥമാധ്യാപകന്‍ സുബൈര്‍ പാട്ടുപാറ, സ്റ്റാഫ് സെക്രട്ടറി ജെസി കെ മാത്യു, അധ്യാപകരായ ഫാസിര്‍ പറവത്ത്, പി.എം അശ്‌റഫലി, റഹീമ വില്ലന്‍, സി ഷൈനി, സ്‌കൂള്‍ ലീഡര്‍ സബീര്‍ പാട്ടുപാറ എന്നിവരുടെ നേതൃത്വത്തിലാണ് കൃഷി നടക്കുന്നത്.