മാന്നാര്‍: ചെന്നിത്തലയില്‍ വീണ്ടും തെരുവ് നായ ശല്യം രൂക്ഷമാകുന്നു. തെരുവ് നായ് അക്രമത്തില്‍ 46 കോഴികള്‍ ചത്തു.ചെന്നിത്തല ഒരിപ്രം വിശാഖത്തില്‍ വിശ്വനാഥന്റെ വീട്ടില്‍ വളര്‍ത്തിയിരുന്ന മുട്ടയിടാന്‍ പ്രായമായ കോഴികളെയാണ് കൊന്നത്.
വിമുക്ത ഭടനായ ഇദ്ദേഹം വീട്ട് വളപ്പില്‍ തന്നെ കമ്പികൊണ്ട് നിര്‍മ്മിച്ച കൂട്ടിലായിരുന്നു കോഴികളെ വളര്‍ത്തിയിരുന്നത്. കൂടിന്റെ അടിഭാഗത്തെ കമ്പികള്‍ കടിച്ച് വളച്ചാണ് നായ്ക്കള്‍ കൂട്ടിനുള്ളില്‍ കയറിയത്. ബഹളം കേട്ട് വീട്ടുകാരെത്തിയപ്പോഴേക്കും കുറെ കോഴികളേയും കൊണ്ട് നായ്ക്കള്‍ കടന്ന് കളഞ്ഞു.
അന്‍പത്തിനാലോളം കോഴികളാണ് കൂട്ടിലുണ്ടായിരുന്നത്. ഇതില്‍ കൂട്ടില്‍ ശേഷിച്ചവയ്ക്കും പരിക്കേറ്റിട്ടുണ്ട്. ചത്ത കോഴികള്‍ മിക്കതും കടിച്ച് കീറിയ നിലയിലായിരുന്നു. മുന്‍പും ഈ ഭാഗത്ത് തെരുവ് നായ ശല്യം ഉണ്ടായിട്ടുണ്ട്.