കോഴിക്കോട്: ജില്ലയിലെ സ്‌കൂള്‍ വിദ്യാര്‍ഥികളുടെ അഞ്ചുദിവസം നീണ്ടുനിന്ന കലാമാമാങ്കത്തിന് ആതിഥ്യം വഹിച്ച ജെ.ഡി.ടി ഇസ്‌ലാം ഹയര്‍ സെക്കന്‍ഡറി സ്‌കൂള്‍ അധികൃതര്‍ ആത്മ സംതൃപ്തിയിലാണ്. വിശാലമായ സൗകര്യമാണ് മത്സരാര്‍ഥികള്‍ക്കും സംഘാടകര്‍ക്കുമായി ഇവര്‍ ഒരുക്കിയത്. ജെ.ഡി.ടിയിലെ പ്രമുഖ സ്ഥാപനങ്ങളെല്ലാം ഇതിനായി വിട്ടുനല്‍കി. പ്രധാന വേദികളെല്ലാം ഇതിനാല്‍ ഇവിടെ തന്നെ സജ്ജീകരിക്കാന്‍ കഴിഞ്ഞു. വലിയ ഹാള്‍ ഭക്ഷണത്തിനായി ഒരുക്കാന്‍ കഴിഞ്ഞതും വിദ്യാര്‍ഥികള്‍ക്ക് വലിയ ആശ്വാസമായി.

വാഹനങ്ങള്‍ പാര്‍ക്ക് ചെയ്യാനും കാംപസില്‍ വിപുലമായ സൗകര്യമുണ്ടായിരുന്നു. ഒന്നാം വേദിയില്‍ കലോത്സവത്തിനെത്തുന്നവര്‍ക്ക് വിശാലമായ സ്ഥലസൗകര്യമാണ് ഒരുക്കിയത്. മൂന്നും നാലും വേദികളിലും വലിയ സൗകര്യമുണ്ടായിരുന്നു. സംഘാടകസമിതിയിലെ വിവിധ വിഭാഗങ്ങള്‍ക്ക് പ്രവര്‍ത്തിക്കാനും പ്രത്യേക സൗകര്യമൊരുക്കി. ജെ.ഡി.ടി അധികാരികളും സ്‌കൂള്‍ അധികൃതരും വലിയ പിന്തുണയാണ് കലോത്സവത്തിന് നല്‍കിയത്.