കോഴിക്കോട്: കുറ്റ്യാടി ജലസേചന പദ്ധതി അറ്റകുറ്റപ്പണി സംബന്ധിച്ച് ജില്ലാ കലക്ടര്‍ ഇടപെട്ട് നടപടി സ്വീകരിക്കണമെന്ന് തൊഴില്‍ മന്ത്രി ടി.പി രാമകൃഷ്ണന്‍. അറ്റകുറ്റപ്പണി സംബന്ധിച്ച് പരിശോധിച്ച് ജില്ലാ കലക്ടര്‍ റിപ്പോര്‍ട്ട് സമര്‍പ്പിക്കുമെന്നാണ് പ്രതീക്ഷിക്കുന്നതെന്നും മന്ത്രി പറഞ്ഞു.
കുറ്റ്യാടി ജലസേചന പദ്ധതി അറ്റക്കുറ്റപ്പണിക്കായി കോടികള്‍ കൈയിലുണ്ടായിട്ടും പണം ചെലവഴിക്കാതെ ഗുരുതരമായ അനാസ്ഥയാണ് ജലസേചന വകുപ്പ് കാണിക്കുന്നതെന്നു കഴിഞ്ഞ ദിവസം നടന്ന ജില്ലാ വികസന സമിതി യോഗത്തില്‍ ജില്ലാ കലക്ടര്‍ എന്‍. പ്രശാന്ത് ആരോപിച്ചിരുന്നു.
ഇതുസംബന്ധിച്ചുള്ള ചോദ്യത്തിനു മാധ്യമ പ്രവര്‍ത്തകരോടു പ്രതികരിക്കുകയായിരുന്നു മന്ത്രി. ജില്ലാ ഭരണാധികാരിയെന്ന നിലയില്‍ കലക്ടറും ഇത്തരം സാഹചര്യം വരാതിരിക്കാനുള്ള നടപടി കൂടി സ്വീകരിക്കേണ്ടതുണ്ടെന്ന് അദ്ദേഹം പറഞ്ഞു. പുതിയ എക്‌സിക്യുട്ടീവ് എന്‍ജിനീയര്‍ ചുമതലയേറ്റതിന് ശേഷം പ്രവൃത്തി നല്ല നിലയില്‍ നടക്കുന്നുണ്ടെന്നും മന്ത്രി പറഞ്ഞു. കുറ്റ്യാടി പദ്ധതിയില്‍ നിന്നുള്ള വെള്ളം ലഭിക്കാത്തതിനാല്‍ ഈ മേഖലയിലെ കൃഷികള്‍ ഉണങ്ങുന്ന അവസ്ഥയാണുള്ളത്. അറ്റകുറ്റപ്പണികള്‍ നടക്കാത്തതിനാല്‍ ഡിസംബര്‍ 26ന് തുറക്കേണ്ട കനാല്‍ ഇപ്പോഴും തുറന്നിട്ടില്ല.