കമ്പളക്കാട്: ഉസ്താദ് നഗര്‍ റസിഡന്‍ഷ്യല്‍ അസോസിയേഷന്‍ ഒന്നാം വാര്‍ഷികാഘോഷങ്ങളുടെ ഭാഗമായി മേപ്പാടി ഡി.എം വിംസുമായി സഹകരിച്ച് മെഗാ മെഡിക്കല്‍ ക്യാംപും സൗഹൃദ സംഗമവും നടത്തി. കമ്പളക്കാട് അന്‍സാരിയ കോംപ്ലക്‌സില്‍ നടന്ന മെഡിക്കല്‍ ക്യാംപില്‍ 500ലധികം ആളുകള്‍ പരിശോധനക്കെത്തി.
എം.എം ഇമ്പിച്ചിക്കോയ മുസ്‌ലിയാര്‍ പ്രാര്‍ഥന നടത്തിയ ചടങ്ങ് ഐ.സി ബാലകൃഷ്ണന്‍ എം.എല്‍.എ ഉദ്ഘാടനം ചെയ്തു. മഹല്ല് കമ്മിറ്റി വൈസ് പ്രസിഡന്റ് വി.പി അബ്ദുഷുക്കൂര്‍ ഹാജി അധ്യക്ഷനായി. 2015ലെ സംസ്ഥാന കലോത്സവത്തില്‍ മികച്ച കാമറാമാനുള്ള പുരസ്‌കാരം നേടിയ ഷമീര്‍ മച്ചിങ്ങലിനെ കണിയാമ്പറ്റ ഗ്രാമ പഞ്ചായത്ത് പ്രസിഡന്റ് കടവന്‍ ഹംസ ഹാജി ആദരിച്ചു. ഡി.എം വിംസ് മാനേജര്‍ സൂപ്പി കല്ലങ്കോടന്‍ മുഖ്യപ്രഭാഷണം നടത്തി. ഉസ്താദ് നഗറില്‍ പുതുതായി രൂപീകരിച്ച സ്‌പോര്‍ട്‌സ് ക്ലബിനുള്ള ഫുട്‌ബോള്‍ കിറ്റ് വിതരണം പനമരം ബ്ലോക്ക് പഞ്ചായത്ത് വൈസ് പ്രസിഡന്റ് കെ കുഞ്ഞായിഷ നിര്‍വഹിച്ചു. ജില്ലാ പഞ്ചായത്തംഗം പി ഇസ്മായില്‍, പഞ്ചായത്തംഗങ്ങളായ കെ.എം ഫൈസല്‍, സുനീറ പഞ്ചാര, റൈഹാനത്ത് ബഷീര്‍, വ്യാപാരി വ്യവസായി ഏകോപന സമിതി കബ്ലക്കാട് യൂനിറ്റ് പ്രസിഡന്റ് ടി.പി അഷ്‌റഫ് സംസാരിച്ചു. ചടങ്ങില്‍ ഐ.സി ബാലകൃഷ്ണന്‍ എം.എല്‍.എയെ പി.സി ഇബ്‌റാഹീം ഹാജി ആദരിച്ചു. വാര്‍ഷികാഘോഷങ്ങളുടെ ഭാഗമായി ലക്കി ഡ്രോ നറുക്കെടുപ്പും നടത്തി. അസോസിയേഷന്‍ പ്രസിഡന്റ് ഷാജി എ ഫൗസ് സ്വാഗതവും സെക്രട്ടറി കെ.കെ ജംഷീദ് നന്ദിയും പറഞ്ഞു. വൈകിട്ട് നടന്ന സൗഹൃദ സംഗമത്തില്‍ മഹല്ല് ഖത്തീബ് അസ്‌ലം ബാഖവി കൊല്ലം പ്രാര്‍ഥന നടത്തി. ജില്ലാ പഞ്ചായത്തംഗം പി ഇസ്മായില്‍ ഉദ്ഘാടനം ചെയ്തു. ഷാജി എ ഫൗസ് അധ്യക്ഷനായി. ആസിഫ് വാഫി റിപ്പണ്‍ മുഖ്യപ്രഭാഷണം നടത്തി. അസീസ് കൊട്ടേക്കാരന്‍, ഹാരിസ് ബാഖവി സംസാരിച്ചു. കെ.കെ ജംഷീദ് സ്വാഗതവും അബ്ദുല്ല സാവാന്‍ നന്ദിയും പറഞ്ഞു.