അമ്മിനിക്കാട്: താഴെക്കോട് പി.ടി.എം ഹയര്‍ സെക്കന്‍ഡറി സ്‌കൂളിലെ എന്‍.എസ്.എസ് യൂനിറ്റിന്റെ നേതൃത്വത്തില്‍ ഗ്രാമദീപം പദ്ധതിയുടെ ഭാഗമായി അമ്മിനിക്കാട് മുള്ളന്‍മട ആദിവാസി കോളനി സന്ദര്‍ശിച്ചു. വിദ്യാര്‍ഥികളില്‍ സാമൂഹികസേവനവും സഹജീവികളോടുള്ള പരിചരണമനോഭാവവും വളര്‍ത്തുക എന്ന ലക്ഷ്യവുമായാണ് സന്ദര്‍ശനം നടത്തിയത്. കോളനിവാസികള്‍ക്ക് വിദ്യാര്‍ഥികള്‍ ശുചിത്വബോധവല്‍ക്കരണം നടത്തി. ഭക്ഷണകിറ്റുകള്‍ വിതരണം ചെയ്തു. കോളനിയും പരിസരവും മാലിന്യമുക്തമാക്കുക കൂടി ചെയ്ത ശേഷമാണ് മുപ്പതോളം വരുന്ന എന്‍.എസ്.എസ് അംഗങ്ങള്‍ മടങ്ങിയത്. ബ്ലോക്ക് പഞ്ചായത്തംഗം കെ.കെ ജാഫര്‍ മാസ്റ്റര്‍ ഉദ്ഘാടനം ചെയ്തു. പ്രോഗ്രാം ഓഫിസര്‍ എ.കെ റബീഹ്, വിദ്യാര്‍ഥികളായ ഫായിസ്, സിദ്‌റ, സുല്‍ത്താന, ബാസിത്ത്, തസ്‌നീം, നബീല്‍ നേതൃത്വം നല്‍കി.