മലപ്പുറം: കോട്ടുമല ബാപ്പു മുസ്‌ലിയാരുടെ ജനാസ സന്ദര്‍ശിക്കാന്‍ അണമുറിയാത്ത ജനപ്രവാഹം. ജനാസ പൊതുദര്‍ശനത്തിനു വെച്ച മലപ്പുറം കോട്ടുമല അബൂബക്കര്‍ മുസ്‌ലിയാര്‍ സ്മാരക ഇസ്‌ലാമിക് കോംപ്ലക്‌സിലേക്ക് ഇന്നലെ വൈകീട്ട് തുടങ്ങിയ ജനപ്രവാഹം ഇപ്പോഴും തുടരുകയാണ്.

ഇന്നലെ രാത്രി എട്ടു മണിക്ക് ആരംഭിച്ച ജനാസ നിസ്‌കാരം ഇന്നു പുലര്‍ച്ചെ വരെ നീണ്ടു. തുടര്‍ന്നു സുബ്ഹി നിസ്‌കാര ശേഷം വീണ്ടും മയ്യിത്ത് നിസ്‌കാരം തുടര്‍ന്നു.

ഇന്നു നടന്ന ജനാസ നിസ്‌കാരത്തിന് ഏലംകുളം ബാപ്പു മുസ്‌ലിയാര്‍, ഉമര്‍ മുസ്‌ലിയാര്‍ കൊയ്യോട്, വാവാട് കുഞ്ഞികോയ മുസ്‌ലിയാര്‍, ബാപ്പു മുസ്‌ലിയാരുടെ മകന്‍ ഡോ. അബ്ദുറഹ്മാന്‍, കെ.പി.സി തങ്ങള്‍ വല്ലപ്പുഴ, സയ്യിദ് ഇമ്പിച്ചിക്കോയ തങ്ങള്‍ തുടങ്ങിയവര്‍ നേതൃത്വം നല്‍കി. സംസ്ഥാന സര്‍ക്കാറിനു വേണ്ടി ഡെപ്യൂട്ടി കലക്ടര്‍ അന്തിമോപചാരമര്‍പ്പിച്ചു.