ഇരിട്ടി: മോദി സര്‍ക്കാര്‍ പാവപ്പെട്ടവര്‍ക്കും സാധാരണക്കാര്‍ക്കും കര്‍ഷകര്‍ക്കും വേണ്ടി നടപ്പാക്കുന്ന പദ്ധതികള്‍ കേരളത്തിലെ ഭരണ-പ്രതിപക്ഷങ്ങള്‍ ചേര്‍ന്ന് അട്ടിമറിക്കുകയാണെന്ന് ബി.ജെ.പി സംസ്ഥാന ജനറല്‍ സെക്രട്ടറി എ.എന്‍ രാധാകൃഷ്ണന്‍. ബി.ജെ.പി ഉത്തരമേഖല യാത്രക്ക് ഇരിട്ടിയില്‍ നല്‍കിയ സ്വീകരണത്തില്‍ സംസാരിക്കുകയായിരുന്നു അദ്ദേഹം. കാലം ഇത്രയേറെ പുരോഗമിച്ചിട്ടും കൊലപാതക രാഷ്ട്രീയം നിര്‍ത്താന്‍ തയാറല്ലാത്ത സി.പി.എം വീടിന് തീയിട്ട് കിടന്നുറങ്ങുന്നവരെ പോലും കൊല്ലുകയാണ്. കോടിയേരി ബാലകൃഷ്ണന് ചെഗുവേരയുടെ പ്രേതം പിടിപെട്ടിരിക്കുകയാണെന്നും അദ്ദേഹം പറഞ്ഞു. മണ്ഡലം പ്രസിഡന്റ് പി.എം രവീന്ദ്രന്‍ അധ്യക്ഷനായി. യുവമോര്‍ച്ച സംസ്ഥാന സെക്രട്ടറി അഡ്വ. എം പ്രകാശ് ബാബു, ജയാ സദാനന്ദന്‍, പ്രമീള നായിക്, വി.കെ സജീവന്‍, സത്യപ്രകാശ് സംസാരിച്ചു.