ഭിക്ഷാടന മാഫിയ സജീവമായതിനും നോട്ടു പ്രതിസന്ധിക്കും കുട്ടികളെ തട്ടിക്കൊണ്ടു പോകുന്നുവെന്ന പ്രചാരണങ്ങള്‍ക്കും അനുബന്ധമായി ചില സ്ഥലങ്ങളില്‍ യാചന നിരോധിച്ചു കൊണ്ടുള്ള ബോര്‍ഡുകള്‍ കാണപ്പെടുന്നു. പിടിച്ചുപറിയും മോഷണവും കുട്ടികള്‍ക്കും സ്ത്രീകള്‍ക്കും നേരെയുള്ള അക്രമവും ഈ തീരുമാനത്തിനു പ്രചോദനമേകിയിട്ടുണ്ടാകും. പ്രഥമ ദൃഷ്ട്യാ ഇതു നല്ലനീക്കമാണെന്നു തോന്നുമെങ്കിലും ചില അപകടങ്ങള്‍ പതിയിരിക്കുന്നുണ്ട്. ഭിക്ഷാടനത്തെ പ്രോത്സാഹിപ്പിക്കുകയോ പിന്തുണയ്ക്കുകയോ അല്ല, ചില ആശങ്കകള്‍ പങ്കുവയ്ക്കുകയാണിവിടെ.
ഭിക്ഷാടന മാഫിയകളെ ഒഴിച്ചുനിര്‍ത്തിയാല്‍ യാചിക്കുന്നത് ജീവിതത്തില്‍ ആശയറ്റവരുടെ അവസാനമാര്‍ഗമെന്ന നിലയ്ക്കായിരിക്കും. ഈ മാര്‍ഗവുംകൂടി അടഞ്ഞാല്‍ ആത്മഹത്യപോലുള്ള കടുത്തചിന്തകളായിരിക്കും അവരുടെ മുന്നിലുണ്ടാകുക. രോഗങ്ങള്‍, പ്രകൃതിക്ഷോഭങ്ങള്‍, വിവാഹം, കലാപം, ഭവനരാഹിത്യം തുടങ്ങിയ കാരണങ്ങളാലും, ആരോഗ്യം ക്ഷയിച്ചതിനാല്‍ ജോലിക്കു പോകാനാവാതെ യാചിക്കുകയെന്ന അറ്റകൈപ്രയോഗത്തിനു നിര്‍ബന്ധിതരായവര്‍ക്കു കനത്തതിരിച്ചടിയാണ് ഇത്തരം നിരോധിതബോര്‍ഡുകള്‍.
ഇവരെ പുനരധിവസിപ്പിക്കാനും സാമ്പത്തികസഹായം ലഭ്യമാക്കാനുമുള്ള ബദല്‍സംവിധാനമുണ്ടാക്കുകയാണ് ആദ്യം ചെയ്യേണ്ടത്. അതല്ലെങ്കില്‍ മുതലാളിത്തവര്‍ഗം അധഃസ്ഥിത വര്‍ഗത്തെ അകറ്റിനിര്‍ത്താന്‍ കണ്ടെത്തിയ മാര്‍ഗമായി ഈ നിരോധം മാറും. കരുണ വറ്റാത്തവരുടെ സഹായമനസ്‌കതയെ ഇല്ലാതാക്കും.
വിവിധ മതസ്ഥാപനങ്ങളുടെ റസിപ്റ്റ് പിരിവ്, സന്ന്യാസിമാര്‍, അന്ധരുള്‍പ്പെടെയുള്ള ഭിന്നശേഷിക്കാര്‍ തുടങ്ങിയവര്‍ക്കും ഈ നിരോധം പ്രതികൂലമാണ്. കുട്ടികളെ തട്ടിക്കൊണ്ടു പോകല്‍ ഊഹാപോഹങ്ങളുടെ സൃഷ്ടിയാണ്. ഭിക്ഷാടനമാഫിയ വാഴുന്ന റെയില്‍വേയില്‍ പോലുമില്ലാത്ത ഈ ധൃതി എലിയെ പേടിച്ച് ഇല്ലം ചുടലാണ്. യാചനയെ ഒരു നിലയ്ക്കും പ്രോത്സാഹിപ്പിക്കുകയല്ലെങ്കിലും നാം ഭിക്ഷക്കാരുടെയും യാചകരുടെയും സ്ഥാനത്തിരുന്നു ചിന്തിക്കണം.
യാചനയുടെ പേരില്‍ പല തെറ്റുകളും ചെയ്യുന്നവരുണ്ടാകാം. പക്ഷേ, എലിയെപ്പേടിച്ച് ഇല്ലം ചുടരുത്. ഒരാള്‍ കൈ നീട്ടുന്നത് തടയാന്‍ ഒരു മനുഷ്യ സ്‌നേഹിക്ക് എങ്ങനെയാകും. യാചന ശക്തമായി നിരുത്സാഹപ്പെടുത്തിയ മുഹമ്മദ് നബി തന്നെ പറഞ്ഞത് ആരെങ്കിലും നിങ്ങളോടു ചോദിച്ചാല്‍ മടക്കരുത് എന്നാണ്. വിവിധ സ്ഥാപനങ്ങളും ചാരിറ്റികളും പ്രവര്‍ത്തിക്കുന്നത് ഉദാരമനസ്‌കരുടെ സഹായംകൊണ്ടാണ്. യാചകനിരോധം ഇത്തരം സേവനങ്ങളെ പ്രതികൂലമായി ബാധിക്കും.
      ഒറ്റപ്പെട്ട സംഭവങ്ങളെ പര്‍വതീകരിച്ചു പാവങ്ങളെ നിലയില്ലാക്കയങ്ങളിലേക്കു തള്ളിവിടരുത്. പൊതുജനങ്ങളും അധികൃതരും ഇത്തരക്കാരെ കണ്ടെത്തി പുനരധിവാസ സഹായ സാധുജനസംഘങ്ങള്‍ രൂപീകരിച്ചു സഹായം എത്തിച്ചു കൊടുക്കണം. യാചനനിരോധിതമേഖലകളില്‍ ബന്ധപ്പെട്ടവരുടെ നമ്പറുകള്‍ നല്‍കി നിസ്സഹായരായ ആളുകള്‍ക്ക് നമ്പറുകള്‍ ലഭ്യമാക്കണം. നാടുകളില്‍ സാധുജനസംരക്ഷണ സമിതികള്‍ രൂപീകരിച്ചു നിസ്സഹായരായവര്‍ക്കു സഹായം ലഭ്യമാക്കണം. ഭിക്ഷാടന മാഫിയകളെയും അഗതികളെയും തിരിച്ചറിഞ്ഞു വേണ്ടവിധം കൈകാര്യം ചെയ്യണം. സംശയംതോന്നുന്നവരെ പൊലിസിലറിയിക്കാനും അവശരെ സഹായിക്കാനും ചെറിയ കുട്ടായ്മകള്‍ രൂപീകരിക്കണം. സന്നദ്ധസംഘടനകളെയും സ്ഥാപനങ്ങളെയും സഹായിക്കാന്‍കൂടി ഈ കൂട്ടായ്മയ്ക്കാവണം.