തൊട്ടില്‍പ്പാലം: മൂന്നാംകൈ ശാഖ എസ്.കെ.എസ്.എസ്.എഫ് കമ്മിറ്റി ജനകീയ പങ്കാളിത്തത്തോടെ നിര്‍മിച്ച ബസ് കാത്തിരിപ്പ് കേന്ദ്രം പഞ്ചായത്തധികൃതരും പൊലിസും ചേര്‍ന്ന് പൊളിച്ചുമാറ്റി. വയനാട്ടിലേക്കുള്ള സംസ്ഥാന പാതയിയില്‍ മൂന്നാംകൈ പാലത്തിന് സമീപത്താണ് കാത്തിരിപ്പ് കേന്ദ്രം നിര്‍മിച്ചിരുന്നത്. ബുധനാഴ്ച വൈകീട്ട് അഞ്ചോടെയാണ് സംഭവം. സ്‌കൂള്‍ വിദ്യാര്‍ഥികളടക്കമുള്ളവര്‍ക്ക് ഉപകാരപ്രദമാകുന്ന കാത്തിരിപ്പ് കേന്ദ്രം കഴിഞ്ഞ 29നായിരുന്നു ശാഖാ കമ്മിറ്റി ജനകീയ പങ്കാളിത്തത്തോടൈ നിര്‍മിച്ചത്.
നിര്‍മാണം അനധികൃതമാണെന്നും പൊളിച്ചുമാറ്റണമെന്നുമാവശ്യപ്പെട്ട് സംഭവസ്ഥലത്തെത്തിയ പഞ്ചായത്തധികൃതരും പ്രവര്‍ത്തകരും തമ്മിലുണ്ടായ സംസാരം വാക്ക് തര്‍ക്കത്തില്‍ കലാശിച്ചു.
പ്രശ്‌നം രൂക്ഷമായതോടെ രാത്രി ഏഴോടെ തൊട്ടില്‍പ്പാലം പൊലിസെത്തി കാത്തിരിപ്പ് കേന്ദ്രം പൊളിച്ചുമാറ്റാന്‍ നടപടി സ്വീകരിക്കുകയായിരുന്നു. സംഭവത്തില്‍ പഞ്ചായത്ത് പക്ഷപാതപരമായ നിലപാട് സ്വീകരിക്കുന്നുവെന്നെന്നാണ് പ്രദേശവാസികള്‍ പറയുന്നത്. ജനോപകരപ്രദമാകുന്ന പ്രവര്‍ത്തനങ്ങളില്‍ ജനങ്ങള്‍ക്കൊപ്പം നില്‍ക്കേണ്ട അധികൃതരുടെ നടപടി പ്രതിഷേധാര്‍ഹമാണെന്ന് ശാഖാ കമ്മറ്റി പറഞ്ഞു.
എന്നാല്‍ അനധികൃത നിര്‍മാണം നടത്തിയതിനാലാണ് പൊളിച്ചുമാറ്റാന്‍ നടപടി സ്വീകരിച്ചതെന്ന് കാവിലുംപാറ പഞ്ചായത്ത് വൈസ് പ്രസിഡന്റ് പി.പി ചന്ദ്രന്‍ പറഞ്ഞു. അതേസമയം നിലവില്‍ പഞ്ചായത്തില്‍ നിര്‍മിക്കപ്പെട്ട വാഹന കാത്തിരിപ്പ് കേന്ദ്രങ്ങളില്‍ ഭൂരിഭാഗത്തിനും നിര്‍മാണ അനുമതി ലഭിക്കാതെയാണ് നിര്‍മിച്ചതെന്നാണാണ് പറയപ്പെടുന്നത്. അതിനാല്‍ ഇത് പഞ്ചായത്ത് പരിശോധിക്കണമെന്നും പകപോക്കല്‍ നടപടി സ്വീകരിക്കരുതെന്നും ശാഖാ കമ്മറ്റി പഞ്ചായത്തിനോട് ആവശ്യപ്പെട്ടു.