ന്യൂഡല്‍ഹി: സൈനികര്‍ക്കു നല്‍കുന്ന ഭക്ഷണത്തെപ്പറ്റി പുറംലോകത്തെ അറിയിച്ച സൈനികന്റെ വാക്കുകള്‍ സത്യമല്ലെന്ന് ആഭ്യന്തര മന്ത്രാലയത്തിന്റെ റിപ്പോര്‍ട്ട്. ബി.എസ്.എഫ് ജവാനായ തേജ് ബഹദൂര്‍ യാദവ് ഫെയ്‌സ്ബുക്കില്‍ പോസ്റ്റ് ചെയ്ത വീഡിയോയുടെ അടിസ്ഥാനത്തില്‍ പ്രധാനമന്ത്രിയുടെ ഓഫിസ് റിപ്പോര്‍ട്ട് ആവശ്യപ്പെട്ടിരുന്നു.

എന്നാല്‍ സൈനികന്‍ പറയുന്ന കാര്യങ്ങളെല്ലാം നിഷേധിച്ചുകൊണ്ടാണ് ആഭ്യന്തര മന്ത്രാലയം റിപ്പോര്‍ട്ട് തയ്യാറാക്കിയിരിക്കുന്നത്. ജവാന്‍ പറയുന്നതില്‍ വസ്തുതയില്ലെന്നാണ് റിപ്പോര്‍ട്ടില്‍ പറയുന്നത്.

ജവാന്‍ പുറത്തുവിട്ട നാലു വീഡിയോകളില്‍ തങ്ങള്‍ക്കു ദിനേന ലഭിക്കുന്ന മോശം ഭക്ഷണത്തെപ്പറ്റി വിശദീകരിക്കുന്നുണ്ട്. രാവിലെ ചൂടാക്കിയ ഒരു റൊട്ടിയും ചായയും മാത്രമാണ് ലഭിക്കുന്നതെന്നും ഉച്ചയ്ക്കും രാത്രിയും ലഭിക്കുന്ന ഭക്ഷണവും സമാനമാണെന്നും ജവാന്‍ വെളിപ്പെടുത്തിയിരുന്നു.

വീഡിയോ പുറത്തുവന്നതിനു പിന്നാലെ വലിയ വിവാദമായി. ഓരോ വീഡിയോയും ലക്ഷണക്കക്കിനു പേരാണ് ഷെയര്‍ ചെയ്തതും കണ്ടതും. വീഡിയോ പുറത്തുവന്നതിനു പിന്നാലെ ഭക്ഷണ കാര്യം ദയനീയമാണെന്നറിയിച്ച് പൂഞ്ചിലെ സി.ആര്‍.പി.എഫ് ജവാനും രംഗത്തെത്തിയിരുന്നു.

അതേസമയം, എന്തെങ്കിലും പ്രശ്‌നമുണ്ടെങ്കില്‍ നേരിട്ടു സമീപിക്കണമായിരുന്നുവെന്ന് സൈനിക മേധാവി ബിപിന്‍ റാവത്ത് ഇന്നു പറഞ്ഞു. അല്ലാതെ സോഷ്യല്‍ മീഡിയയിലൂടെ പുറത്തുവിടുകയല്ല വേണ്ടതെന്നും അദ്ദേഹം മാധ്യമങ്ങളോടു പറഞ്ഞു.

തങ്ങള്‍ക്കു ലഭിക്കേണ്ട ഭക്ഷണം മേലുദ്യോഗസ്ഥര്‍ തടഞ്ഞുവച്ച് മറിച്ചുവില്‍ക്കുന്നുവെന്നായിരുന്നു ജവാന്‍ ഉന്നയിച്ച പ്രധാന ആരോപണം. പരാതി പറഞ്ഞിട്ടും നടപടിയൊന്നുമുണ്ടായിട്ടില്ലെന്നും അദ്ദേഹം പറഞ്ഞിരുന്നു.