കൊല്ലം: കരുനാഗപ്പളളി നഗരസഭയെ ജില്ലയിലെ ആദ്യ വെളിയിട വിസര്‍ജ്ജന മുക്ത (ഒ.ഡി.എഫ്) നഗരസഭയായി പ്രഖ്യാപിച്ചു. നഗരസഭാ കൗണ്‍സില്‍ യോഗത്തില്‍ ചെയര്‍പേഴ്‌സണ്‍ എം. ശോഭന പ്രഖ്യാപനം നടത്തി. ഒ.ഡി.എഫ് പദ്ധതിയിലുളള എല്ലാ ശുചിമുറികളുടെ നിര്‍മാണവും പൂര്‍ത്തീകരിച്ചതായി ചെയര്‍പേഴ്‌സണ്‍ അറിയിച്ചു. ശുചിമുറിയില്ലാത്ത 197 വീടുകളാണ് ആദ്യം നഗരസഭ നടത്തിയ സര്‍വ്വേയില്‍ കണ്ടെത്തിയത്. എന്നാല്‍ ടാങ്ക് പൊട്ടിപ്പൊളിഞ്ഞതും വൃത്തിഹീനവുമായ കുഴി കക്കൂസുകള്‍ ഉള്‍പ്പെടെയുളള 368 എണ്ണം കൂടി ശുചിത്വ കക്കൂസാക്കി മാറ്റുന്നതിന് നഗരസഭ തീരുമാനിക്കുകയായിരുന്നു. ആകെ 565 ശുചിമുറികളാണ് നിര്‍മിച്ചു നല്‍കിയത്. ഒരു ശുചിമുറിക്ക് 15,400 രൂപയാണ് ധനസഹായമായി നല്‍കിയത്. ഗുണഭോക്താക്കള്‍ക്കായി നഗരസഭ ആകെ 87,01,000 രൂപ ചെലവഴിക്കുന്നു.
ഫെബ്രുവരി 28നകം സംസ്ഥാനത്തെ നഗരസഭാ പ്രദേശങ്ങളെ ഒ.ഡി.എഫ് ആയി പ്രഖ്യാപിക്കുന്നതിനാണ് സംസ്ഥാന സര്‍ക്കാര്‍ തീരുമാനിച്ചിട്ടുളളത്. കരുനാഗപ്പള്ളി ഒന്നര മാസങ്ങള്‍ക്ക് മുമ്പേ ലക്ഷ്യം നേടുന്നതിന് മുന്‍കൈ എടുത്ത് പ്രവര്‍ത്തിച്ച ജില്ലാ കലക്ടര്‍ മിത്ര .റ്റി, ജില്ലാ ശുചിത്വ മിഷന്‍, ജനപ്രതിനിധികള്‍, ഉദ്യോഗസ്ഥര്‍ എന്നിവരെ നഗരസഭാ കൗണ്‍സില്‍ അഭിനന്ദിച്ചു.
നഗരസഭയില്‍ ഒ.ഡി.എഫ് സ്ഥിതി വിലയിരുത്തുന്നതിനായി കേന്ദ്ര സര്‍ക്കാര്‍ നിയോഗിക്കുന്ന ക്വാളിറ്റി കൗണ്‍സില്‍ ഓഫ് ഇന്ത്യയുടെ പരിശോധന നടത്തുമെന്ന് യോഗത്തില്‍ പങ്കെടുത്ത ശുചിത്വ മിഷന്‍ ജില്ലാ കോ ഓര്‍ഡിനേറ്റര്‍ ജി കൃഷ്ണകുമാര്‍ പറഞ്ഞു. വൈസ് ചെയര്‍പേഴ്‌സണ്‍ സക്കീന സലാം, ആരോഗ്യ സ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ സുബൈദാ കുഞ്ഞുമോന്‍, സ്ഥിരംസമിതി അധ്യക്ഷന്‍മാര്‍, നഗരസഭാ അംഗങ്ങള്‍, സെക്രട്ടറി ഷെര്‍ളാ ബീഗം, നോഡല്‍ ഓഫീസര്‍ വി.എസ് വിനോദ് പങ്കെടുത്തു.