കൊടുങ്ങല്ലൂര്‍: സ്റ്റേഷനില്‍ കയറാന്‍ ശ്രമിച്ച മോഷ്ടാവിനെ തേടിയിറങ്ങിയ പൊലിസുകാര്‍ എത്തിയത് വാനരന് മുന്നില്‍. കൊടുങ്ങല്ലൂര്‍ പൊലിസ് സ്റ്റേഷനില്‍ വ്യാഴാഴ്ച്ച രാത്രിയിലായിരുന്നു സംഭവം. സ്റ്റേഷന്‍ കെട്ടിടത്തിന്റെ മുകളിലത്തെ നിലയില്‍ ഡ്യൂട്ടി കഴിഞ്ഞ് വിശ്രമിക്കുകയായിരുന്ന പൊലിസുകാരാണ് ഇരുമ്പ് തകിട് മേഞ്ഞ മേല്‍ക്കൂരയില്‍ ആരോ ചാടുന്ന ശബ്ദം കേട്ടത്. ഇതോടെ ജാഗരൂകരായ പൊലിസുകാര്‍ കള്ളനെ കൈയോടെ പിടികൂടുവാനായി നാലുപാടും തിരഞ്ഞു. ഇതിനിടയിലാണ് യഥാര്‍ത്ഥ 'പ്രതി' പൊലിസിന്റെ മുന്നിലകപ്പെട്ടത്. ഒത്ത വലുപ്പമുള്ള വാനരനായിരുന്നു കക്ഷി. അല്‍പനേരത്തേക്ക് തങ്ങളെ വിരട്ടിയതെന്നറിഞ്ഞതോടെ പ്രതിയെ വെറുതെ വിട്ട് പൊലിസുകാര്‍ പിന്‍ വാങ്ങി. വാനരന്റെ വിക്രിയകള്‍ നാട്ടുകാരെ ഭയപ്പെടുത്തുന്നുണ്ടെന്നാണ് സൂചന.