മലപ്പുറം: വിവരാവകാശ പ്രവര്‍ത്തകനെ നിയമവിരുദ്ധമായി ഓഫിസില്‍ തടഞ്ഞുവച്ചു പീഡിപ്പച്ചെന്ന പരാതിയില്‍ ഡിവൈ.എസ്.പി ഉള്‍പ്പെടെ നാല് പൊലിസ് ഉദ്യോഗസ്ഥര്‍ക്കെതിരേ വിശദമായ അന്വേഷണം നടത്താന്‍ പൊലിസ് കംപ്ലെയിന്റ് അതോറിറ്റി ഉത്തരവിട്ടു. മലപ്പുറം കണ്ടംവെട്ടിക്കാവ് സ്വദേശി മനോജ് കേദാരം നല്‍കിയ പരാതിയിലാണ് ജില്ലാ പൊലിസ് കംപ്ലെയിന്റ് അതോറിറ്റി ഉത്തരവ്.
മലപ്പുറം ഡിവൈ.എസ്.പിയായിരുന്ന എസ്. അഭിലാഷ്, സഹപ്രവര്‍ത്തകരായ ഗ്രേഡ് എസ്.ഐ ഇബ്രാഹിം, സി.പി.ഒമാരായ ദിനേശന്‍, രാജേഷ് രവി എന്നിവര്‍ക്കെതിരേയാണ് അന്വേഷണം. മൂന്നു മാസത്തിനകം അന്വേഷണം പൂര്‍ത്തിയാക്കി റിപ്പോര്‍ട്ട് സമര്‍പ്പിക്കണം.
2013 ഓഗസ്റ്റ് 19നാണ് പരാതിക്കാധാരമായ സംഭവം. വിവരാവകാശ അപേക്ഷയുമായി ബന്ധപ്പെട്ട് സംശയങ്ങള്‍ തീര്‍ക്കാനെന്നു പറഞ്ഞു മനോജിനെ ഓഫിസിലേക്കു വിളിച്ചുവരുത്തുകയും വിവരാവകാശ അപേക്ഷകള്‍ പിന്‍വലിക്കമെന്നാവശ്യപ്പെട്ട് ഭീഷണിപ്പെടുത്തുകയും പീഡിപ്പിക്കുകയും ചെയ്തുവെന്നാണ് പരാതി.
വിവാദമായതോടെ ഡിവൈ.എസ്.പി ഓഫിസിലെ വിവരങ്ങള്‍ അനധികൃതമായി മൊബൈല്‍ ഫോണില്‍ പകര്‍ത്തിയെന്നാരോപിച്ചു മനോജിനെതിരേ കേസെടുക്കുകയും ചെയ്തിരുന്നു.