മസിനഗുഡി: കാട്ടാനയുടെ ആക്രമണത്തില്‍ ചായക്കടക്കാരന് ഗുരുതരമായി പരുക്കേറ്റു. മസിനഗുഡി കല്ലട്ടി സ്വദേശി കൃഷ്ണന്‍ (54) ആണ് പരുക്കേറ്റത്. ഇയാളെ ഊട്ടി ജില്ലാ ആശുപത്രിയില്‍ പ്രവേശിപ്പിച്ചു. കല്ലട്ടി വനമേഖലയില്‍ വിറക് ശേഖരിക്കുന്നതിനിടെയാണ് ഇയാളെ കാട്ടാന ആക്രമിച്ചത്. കല്ലട്ടി വനംവകുപ്പ് ചെക്‌പോസ്റ്റിന് സമീപത്ത് ചായക്കട നടത്തിവരികയാണ് ഇയാള്‍. ഇന്നലെ രാവിലെ 9.30നാണ് സംഭവം. വനംവകുപ്പ് ജീവനക്കാരും നാട്ടുകാരും ഒച്ചവച്ചതിനെത്തുടര്‍ന്നാണ് ആന പിന്തിരിഞ്ഞത്.